मङ्गलबार, २३ असार २०७७
samadhannews
nepal telecome

१८ औं आहा रारा गाेल्ड कपः पुलिसलाई ३–४ ले हराउँदै मनाङ विजेता

आइतबार, ०२ चैत २०७६
2690 पटक पढिएको

सुरेशराज अधिकारी
पोखरा

आहा रारा गोल्ड कप उपाधि मनाङ मस्याङ्दी क्लबले जितेको छ । टाइब्रेकरमा पुलिसलाई ३–४ ले हराउँदै मनाङ विजेता बनेको हो । मनाङले १० लाख १ हजार रुपैयाँ, सिल्ड, मेडल र प्रमाणपत्र पाएको छ ।

उपविजेतामा चित्त बुझाउँदै पुलिस क्लबले ५ लाख १ हजार नगदसहित सिल्ड, मेडल र प्रमाणपत्र पाएको छ । मनाङको जितका लागि टाइब्रेकरमा अन्जन विष्ट, पुजन उपरकोटी, सुरज विक र रञ्जन विष्टले गोल गरे । टाइब्रेकरमा निशान लिम्बुको प्रहार पुलिसका गोलकिपर रोशन खड्काले बचाउ गरे ।

पुलिसका लागि भोला सिलवाल, हेम तामाङ र बुद्ध तामाङले गोल गरे । ट्राइब्रेकरमा पुलिसका खेलाडी तेज तमाङ र अजित भण्डारीका प्रहार मनाङका किपर अशोक बरालले असफल बनाए । शनिबार पोखरामा रंगशालमा भएको फाइनल खेलमा निर्धारित समयमा कुनै टिमले खाता खोल्न सकेनन् । अतिरिक्त समयमा पनि दुवै टिम गोलविहीन भएपछि खेल टाइब्रेकरमा धकेलिएको हो ।

मनाङको तर्फबाट खेलको ६१ औं मिनेटमा अन्जन विष्टले प्रहार गरेको बल क्रसबारबाट बाहिरियो । ६९ औं मिनेटमा भिदाल लुइसको पासमा विमल रानाले प्रहार गरेको बल गोल हुन सकेन । खेलमा मनाङले राम्रो खेल प्रर्दशन गरे पनि फिनिसिङ गर्न सकेन ।

पुलिसका लागि खेलको ७४ औं मिनेटमा तेज तमाङको पासमा भरत शाहले प्रहार गरेको बल पनि क्रसबारबाट बाहिरियो । पहिलो हाफमा पुलिसका खेलाडीले राम्रो खेल्न सकेनन् । पुलिसले पाएका केही अवसरलाई गोलमा परिणत गर्न सकेन ।

प्रतियोगिताको उत्कृष्ट गोलरक्षक मनाङका अशोक बराल, बेस्ट डिफेन्डर मनाङका सुरज विक, बेस्ट मिडफिल्डर मनाङका खेलाडी नितिन थापा र बेस्ट स्टाइगर मनाङका खेलाडी अन्जन विष्ट घोषित भए । पुलिसका भोला शाहा, मनाङका अन्जन विष्ट, पुलिसका निरकुमार राई र थ्रि स्टारका सुशन श्रेष्ठले समान २ गोल गर्दै हाइ स्कोरर भए । उत्कृष्ट कोच मनाङका फुजा टोपे र बेस्ट प्यलेर पुलिस क्लबका अजित भण्डारी बने ।

मनाङले यसअघि ५ पटक उपाधि उचालेको छ । २२ फागुनबाट सुरु भएको प्रतियोगितामा १० टिम सहभागी थिए । प्रतियोगिताका लागि १ करोड १८ लाख आम्दानी र ९९ लाख रुपैयाँ खर्च लाग्ने आयोजकको अनुमान छ । सहारा क्लबले सञ्चालन गरिरहेको सहारा फुटबल एकेडेमीमा हाल १५ जिल्लाका २४ जना बालबालिका आश्रित छन् । क्लबले पोखरा १७ दोबिल्लामा फुटबल एकेडेमी स्थापना गरेको छ । प्रतियोगिताको बचत यही एकेडेमीमा खर्च हुने जनाइएको छ ।

राष्ट्रिय खेलकुद परिषद सदस्य सचिव रमेशकुमार सिलवालले पोखरा रंगशाला निर्माण अब ३ महिनामा सकिने बताए । उनले यही रंगशालामा ९ औं राष्ट्रिय खेलकुद प्रतियोगिताका लागि अन्य संरचना निर्माण गरिने उल्लेख गरे । सिलवालले पौडी, गल्र्फ, मार्सल आर्ट लगायतका खेलका संरचना पोखरामा रंशालामा बनाउने सुनाए । उनले पोखरालाई अन्तर्राष्ट्रिय खेलकुद प्रतियोगिता गर्ने केन्द्र बनाउने योजना सुनाए ।

सम्बन्धित खबर