सोमबार, २४ चैत २०७६
samadhannews
nepal telecome

विशेष सम्पादकीयः कोरोना विरुद्धको लडाइ, पुरानै सम्बन्ध–पृथक शैली

आइतबार, ०९ चैत २०७६
2510 पटक पढिएको

रामकृष्ण ज्ञवाली, सम्पादक समाधान राष्ट्रिय दैनिक

विश्व मानव समुदायले यतिबेला अकल्पनीय अवस्था भोगिरहेको छ । प्राण घातक कोरोना भाइरसबाट बच्ने प्रयास गर्दै करोडौं मानिस आफ्नै घरमा बन्दी भएका छन् । २ लाख हाराहारीमा अस्पताल वा आइसोलेसन वार्डमा उपचाररत छन भने झण्डै १२ हजार जनाले ज्यान गुमाइसकेका छन् । तीव्र गतिमा फैलिने विशेषता भएको यो भाइरसबाट जोगिन र यसलाई परास्त गर्न विश्व एक ढिक्का भएर प्रयास गरिरहेको छ । यो विषम परिस्थितिमा नेपाल पनि उच्च जोखिममा छ । युरोप र अमेरिका जस्ता सम्पन्न देश त निरीह बनिरहेको वर्तमान अवस्थामा हाम्रो देशमा यो भाइरस फैलियो भने त्यसका विरुद्ध लड्न हामीसँग ज्यादै थोरै विकल्प हुने छन् । त्यसकारण यसलाई फैलिन नदिन हामी सबै जिम्मेवार बन्नै पर्छ ।
अहिले नेपाल सरकारले देशमा सेमी लकडाउन घोषणा गरेको छ । बेलैमा उच्च सतर्कता अपनाएको चीनले भाइरसमाथि काबु पाइसकेको छ भने हेलचक्र्याई गर्दाको परिणाम इटलीसहित युरोप, अमेरिका लगायतका देशले भोगिरहेका छन् । छिमेकी मुलुक भारतमा कोरोना भाइरस तीव्र गतिमा विस्तार हुन थालेपछि हामी उच्च जोखिममा छौं । यो अवस्थामा सरकारले चालेका हरेक कदममा साथ दिएर कोरोना विरुद्धको लडाइ लड्नुको विकल्प हामीसँग छैन । र, पनि हामी तपाई पाठकले विश्वास गरेको भरपर्दो सञ्चारमाध्यम भएको नाताले यो महामारी फैलिएको बेलामा चल्ने अफवाहलाई चिर्ने र सत्य सूचना तपाईहरु माझ पु¥याउनु पर्ने दायित्वबाट बिमुख हुन सक्दैनौं । यसैले निरन्तर प्रकाशन हुनुको विकल्प छँदै छैन । यस्तो बाध्यता एकातिर छ, तर हाम्रा कर्मचारी र सहकर्मीको स्वास्थ्यमाथि खेलवाड गर्ने अधिकार पनि हामीसँग छैन ।

यस्तो कठिन परिस्थितिमा पाठक र पत्रिकाबीचको सम्बन्धलाई निरन्तरता दिन केही पृथक शैली अपनाउनुपर्ने भएको छ । समाचार संकलन गर्न फिल्डमा जान सक्ने अवस्था नरहन सक्ने भएकाले संवाददाताहरुले घरमै बसेर रिपोर्टिङ गर्नुहुनेछ भने केही डेक्स सम्पादक र अत्यावश्यक कर्मचारीमात्र कार्यालयमा उपस्थित रहनेछौं । सबैभन्दा ठूलो चुनौती पत्रिका विरतणमा देखिएको छ । आजसम्म हामीले तपाईका घर घरमा पत्रिका पुर्‍याइरहेका छौं । तर भोलिका दिनबाट यो सम्भव नहुने देखिएको छ । यस्तो अवस्थामा सम्भव भएसम्म तपाईकै घर नजिकैका प्रतीक्षालयहरुमा समाधान दैनिक राखिएको हुनेछ । त्यहाँबाट निशुल्क रुपमा आफ्नो प्रति लिन सक्नुहुनेछ । समाधान दैनिकका वार्षिक ग्राहक बाहेकका अन्य महानुभावलाई विशेष आग्रह छ, प्रतीक्षालयमा राखिएको पत्रिका पढेर त्यही छोडिदिनु होला । वार्षिक ग्राहकले मात्र पत्रिका घरमा लैजानु होला । यसका अलावामा समाधान मिडिया प्रालिले सञ्चालन गरेको samadhannews.com अनलाइन न्युज पोर्टलमार्फत् हामी निरन्तर अपडेट भइरहनेछौं । पोखरा र आसपासमा स्थानीय प्रतिक्षालयसम्म पत्रिका पुर्याउने प्रयास गरेपनि १० गते देखि लामो दुरीका बस सेवा बन्द हुने भएकाले बाहिर जिल्लामा पठाउन सम्भव छैन । त्यसैले तपाईको घरमा पत्रिका नआए पनि यो न्युज पोर्टलमा इपेपर अपलोड भएको हुनेछ । यो कठिन परिस्थितिमाथि जित हासिल नहुन्जेलसम्म यही इपेपरले तपाई हाम्रो विश्वासिलो सम्बन्ध कायमै राख्न सघाउनेछ भन्ने विश्वास लिएको छु ।

एउटा सानो गल्तीले ठूलो विपत्ति निम्त्याउन सक्छ । त्यस कारण भाइरस फैलिन नदिने गरी उच्च सतर्कता अनपाउनु हाम्रो साझा दायित्व हो । हामी नेपाली हौं, हाम्रो आत्मबल बलियो छ । विश्वास छ हाम्रो आत्मबल र सजगताका कारण कोरना भाइरस पराजित हुनेछ । त्यसैले संयमित बनौं, आतंकित नबनौं । अप्ठेरो परिस्थितिमा एकले अर्कोलाई सहयोग गरौं । कामना गरौं हामी छिट्टै सामान्य जनजीवनमा फर्किनेछौं र पूर्ववतशैलीमै संवाद गरिरहनेछौं ।

सम्बन्धित खबर