बिहिबार, १५ जेठ २०७७
samadhannews
nepal telecome

आँधिखोला पिस युवा क्लबद्वारा खाद्यान्न सहयाेग

आइतबार, २३ चैत २०७६
2110 पटक पढिएको

समाधान संवाददाता


आँधिखोला पिस युथ क्लब बयारघारीले भीरकोट नगरपालिकाको कार्यालयलाई खाद्यान्न सामग्री हस्तान्तरण गरेको छ । नगरपालिकाको कार्यालयमा क्लब अध्यक्ष राजकुमार गुरुङले खाद्यान्न सामग्री नुन, दाल र चामल हस्तान्तरण गरेका हुन् ।

भीरकोट नगरपालिका भित्र रहेका अति न्यूनवर्गीय परिवारहरुका लागि राहात स्वरुप खाद्यान्न सामग्री हस्तान्तरण गरेको अध्यक्ष गुरुङले बताए । दैनिक ज्याला मजदुरी गर्ने परिवारका लागि लकडाउनले पारेको प्रभावलाई मध्यनजर गर्दै क्लबले नेपाल सरकारको निर्देशन अनुरुप नगरपालिकामा हस्तान्तरण गरेकाे उनकाे भनाइ थियाे ।

 खाद्यान्न सामग्री वितरण गर्ने क्लबको योजनामा साथ दिँदै देश तथा विदेशमा रहनु हुनेले समेत आर्थिक सहयोग गरेको उनले जनाए ।

सामग्री  ग्रहण गर्दै नगरप्रमुख छायाराम खनाल एवं प्रमुख प्रशासकीय अधिकृत राजेन्द्रप्रसाद पौडेलले खाद्य सामग्री यथाशीघ्र सम्बन्धित परीवारलाई वितरण गर्ने प्रतिबद्धता समेत जनाए । क्लबले प्रत्येक परिवारको लागि १० किलो चामल, १ किलो नुन र १ किलो दाल गरी ५० परिवारका लागि खाद्यान्न सामग्री हस्तान्तरण गरेको छ ।

यसअघि क्लबले स्याङ्जा जिल्ला कारागारमा २ सय वटा मास्क वितरण एवं  भीरकोट नगरपालिकाको कार्यालयलाई ७ लिटर सेनिटाइजर र १०० थान मास्क हस्तान्तरण गरेको थियो । त्यस्तै कोरोना भाइरसको रोकथामका लागि भीरकोट नगरपालिका वार्ड न. ८ को टोलटोलमा पुगेर सेनिटाइजर, साबुन तथा मास्क वितरण सहित सचेतना कार्यक्रमको आयोजना समेत गरेको थियो ।

कार्यक्रममा क्लबका उपाध्यक्ष बिश्वास कर्माचार्य, भीरकोट जेसिज् वर्ष २०२० का वरिष्ठ उपाध्यक्ष प्रसुन मगर, क्लबका सह-कोषाध्यक्ष सुजाता गुरुङ सहित नगरपालिकाका पदाधिकारीहरुको समेत उपस्थिति थियो । 

सम्बन्धित खबर