मङ्गलबार, २० जेठ २०७७
samadhannews
nepal telecome

बाग्लुङमा पटक पटक लापरवाही, यस्तै गरे बर्बाद हुन्छ

सोमबार, ०१ बैशाख २०७७
171360 पटक पढिएको

रामकृष्ण ज्ञवाली

विश्वभर महामारीको रुपमा फैलिएको कोरोना भाइरसको संक्रमण नेपालमा बिस्तार हुन नदिन सरकारले देशैभर लकडाउन जारी राखेको छ । काठमाण्डौंमा पहिलो दोश्रो संक्रमण भेटिएपछि यो भाइरसलाई समुदायमा फैलन नदिन देशैभर लकडाउन घोषणा गरियो, जुन निकै प्रभावकारी पनि देखिएको छ ।

काठमाण्डौंपछि देशमा कोरोना भाइरसको संक्रमण देखिएको ठाउ गण्डकी प्रदेश हो । गण्डकीको बाग्लुङ जिल्लामा पहिलो कोरोना संक्रमण भएको थियो । त्यो बेलामा बाग्लुङमा कोरोना नियन्त्रण गर्ने जिम्मा पाएका स्थानीय जिम्मेबारवालाहरुले गम्भीर गल्ती गरेका थिए । यस्तै गल्ती अहिले पनि गरेका छन् ।

विदेश ट्राभल हिस्ट्री भएको र ज्वरो आएको विरामीलाई समेत क्वारेन्टाइनमा वा आइशोलेशन वार्डमा नराखेर सामान्य भन्दै घर पठाइयो । पछि उनी संक्रमित भएको पुष्टी भयो । उनीसंगे आएकी ती युवतीकी हजुर आमा पनि अहिले संक्रमित भएको प्रमाणित भएको छ ।

उनीहरु विदेशबाट आएपछि यति एअरको विमानमा पोखरा र जिपमा बाग्लुङ गएका थिए । उनीहरुको सम्पर्कमा आएका मानिसहरुको खोजीमा ढिलाई गरियो । हाम्रो भाग्यले साथ दिएको भन्नु पर्छ, उनीहरुबाट दोश्रोमा सरेको अहिलेसम्म फेला परेको छैन ।

पहिलो घटनामा नै गम्भीर गल्ती गरेका बाग्लुङका जनप्रतिनिधि र अधिकारीहरुले त्यसपछि पनि पाठ सिकेका रहेनछन् भन्न्े कुरा काठेखोला गाविसको घटनाले फेरि उदाङगो पारेको छ । जसरी पहिलो संक्रमित युवतीलाई कहाँ राख्ने भन्ने सवालमा त्यहा ठुलै लफडा भएको थियो । संक्रमण पुष्टी भएको ७ भण्टा पछि राती करिब ११ बजे उनलाई बाग्लुङ अस्पतालको क्वारेन्टाइनमा लगिएको थियो । काठेखालामा पनि त्यस्तै भयो ।

अहिले बाग्लुङमा रयापिड टेष्ट भैरहेको छ । टेष्ट गर्दा पोजेटिभ वा नेगेटिभ यी दुई रिजल्ट नै आउने हो । तर पोजेटिभ परिणाम आयो भने के गर्ने भन्ने तयारी उनीहरुसंग केही छैन भन्ने कुरा हिजाको काठे खोला घटनाले देखायो ।

सो गाउपालिकाको वडा नम्बर ६ मा चैत्र ६ गते भारतबाट फर्किएकी एक बृद्धामा पोजेटिभ देखियो । उनीहरुको विदेश ट्राभल हिस्ट्री भएकै कारण टोली परिक्षणमा गएको थियो । तर त्यहाँ जाँदा पोजेटिभ परिणाम देखिए के गर्ने भन्ने कुरामा न त स्वास्थ्यकर्मीको कुनै तयारी थियो, न त स्थानीय सरकारको नै ।

परिणाम पोजेटिभ देखेपछि खटिएका स्वास्थ्यकर्मी आफै डराए । उनलाई घर मै छोडेर हिड्नेसम्मको परिस्थिति बन्यो । गाउमा एक जनालाई कोरोना भाइरसको संक्रमण हुन सक्ने सम्भावना देखिएपछि सिङ्गो गाउलाई नै क्वारेन्टाइन गर्नु पर्ने हुनसक्छ । त्यहाँ पनि सदरमुकामकै चाला भयो ।

बल्ल बल्ल स्थानीय विद्यालयमा एउटा क्वारेन्टाइनको व्यवस्था गरेर उनलाई त्यही राख्ने निर्णय गरियो । तर त्यहाँ पुर्याउने कसले ? ६५ बर्षीया बृद्धा आमा कोरोना पोजेटिभ हुन सक्छ भन्ने त्रासले त्यसै डराउनु भएको थियो । उहाँलाई विद्यालयसम्म पुर्याउन निकै पापड पेल्नु पर्यो ।

यहाँ सम्मकी एम्बुलेन्सले समेत उनलाई बोक्न मानेन । नेपाल रेडक्रस सोसाइटीले नै सञ्चालन गरेको एम्बुलेन्स नै जिम्मेबारी भाग्छन ? यसको जवाफदेही को हो ? भाग्यले साथ दिएका कारण बाग्लुङमा अरु संक्रमित देखिएका छैनन् । पहिलो संक्रमण हुँदा त ठिकै छ । कुनै तयारी थिएन, एक्कासी देखियो भन्न पाइएको थियो । तर अहिले त बाग्लुङ गण्डकीको हट स्पट हो । यही हट स्पटमा अर्को संक्रमणको सम्भावित मानिस भेटिदा पनि भागाभाग हुन्छ भने कोरोनाका विरुद्धको लडाईमा हाम्रो तयारीलाई कसरी मुल्याङ्कन गर्ने ?

अझै लाजमर्दो कुरा त के छ भने बाग्लुङ जिल्लाका कुनै पनि एम्बुलेन्स कोरोना संक्रमितलाई बोक्न तयार छैनन् । त्यसैले बाग्लङ प्रहरीले जिल्ला रेडक्रस सोसाइटीको एम्बुलेन्स कब्जा गरेर राखेको छ । रेडक्रसले चालक दिएको छैन । नेपाल प्रहरीले आफ्नै सिपाहीलाई एम्बुलेन्सको चालक बनाएको छ । आइतबार पनि काठेखोलाका संक्रमित आशंका भएकी बृद्धालाई क्वारेन्टाइनसम्म पुर्याउन त्यही प्रहरी चालक भएको एम्बुलेन्स गाउ पुग्नु पर्यो । सरकारले त्यसको व्यवस्थापन गर्न स्थानीय सरकारलाई भनेको छ । तर गरिएन। र त जिल्ला प्रहरी कार्यालयबाट प्रहरीले चलाउने एम्बुलेन्स पठाउनु पर्यो ।

यस्तै लापरवाही गर्ने हो, र जिम्मेबारीबाट भाग्ने हो भने, गण्डकी प्रदेशमा बर्बाद हुन सक्छ । भारतमा सरकारले घनिभुत प्रयास गर्दा गर्दै तबलिकी जमाात मस्जिदका कारण पुरै भारत बर्बाद भयो । त्यस्तै बाग्लुङमा गरिएका लापरवाहीले पुरै नेपाल बर्बाद हुनसक्छ । बेलैमा व्यवस्थापन गरौं । सजग बनौं । आज रोकथाम गर्न सकिने अवस्थामा छौं, भोली पछुताउनु नपरोस ।

सम्बन्धित खबर