बिहिबार, १८ असार २०७७
samadhannews
nepal telecome

गण्डकी प्रदेशमा लक डाउन खुकुलो बनाएर गाउँका विद्यालय खोल्ने तयारी

बुधबार, २४ बैशाख २०७७
156110 पटक पढिएको

आउने‍ वर्ष बजेट बढाइने

पाेखरा

गण्डकी प्रदेश सरकारले आउँदो आर्थिक वर्ष शिक्षा क्षेत्रमा बजेट बढाउने भएकाे छ । विद्यालय र शिक्षकलाई प्रविधिमैत्री बनाउनका लागि बजेट बृद्धि गर्न लागिएको हो । शिक्षा पत्रकार समूहले कोरोना प्रभाव र गण्डकी प्रदेशले शिक्षा व्यवस्थापनका लागि मंगलबार गरेको भर्चुअल प्रेस मिटमा सामाजिक विकासमन्त्री नरदेवी पुनमगरले बताइन् ।

लक डाउन लम्बिँदै जाँदा परिक्षाफल प्रकाशित गर्न र नयाँ शैक्षिकसत्र सञ्चालनमा अन्यौल भइरहेका बेला सामुदायिक विद्यालयमा प्राविधिक कठिनाइले अनलाइन कक्षा सञ्चालन गर्न नसकिएपछि विद्यालयहरुलाई प्रविधिमैत्री बनाउन लागिएको उनले बताइन् ।

गण्डकी प्रदेशमा केही निजी स्कुलले मात्र सिमित अनलाइन कक्षा चलाएका छन् । केही विद्यालयले अभ्यास गरे पनि पोखरा महानगरपालिकाले सबै विद्यार्थीको पहुँच गराएर मात्र त्यस्ता कक्षा सञ्चालन गर्न भन्दै रोक लगायो । शिक्षामा सबैको पहुँच हुनुपर्छ । तर, विपन्न वर्गसंग बालबालिकासंग स्मार्ट फोन, टिभी र ल्यापटप छैन, मन्त्री पुनमगरले भनिन्, यस्तो स्थितिमा गाउँलाई कडाईका साथ लकडाउनमा राखेर विद्यालयमै कक्षा सञ्चालन गर्नेबारे छलफल हुँदैछ ।

कोरोना महामारी र लक डाउनका कारण विद्यालयहरुले परिक्षाफल प्रकाशित गर्न सकेका छैनन् । अधिकांश शिक्षकहरु प्रदेशबाहिरका भएकाले उनीहरु रोकिँदा विद्यालयहरुको नतिजा तयारीमा कठिनाई भएको मन्त्री पुनमगरले बताइन् । शिक्षक आए कोरोना भित्रिने डर छ, नआएसम्म परिक्षाफल प्रकाशित गर्न सकिएको छैन, उनले भनिन्, नयाँ शैक्षिकसत्र सुरु गर्न पनि प्रदेशबाहिरबाट शिक्षकहरु फर्किनुपर्ने स्थिति छ ।

गण्डकी सरकारले प्रदेशलाई सिल गरेर लकडाउन खुकुलो बनाउने र गाउँगाउँमा विद्यालय खोल्ने तयारी गरेको मन्त्री पुनमगरले बताइन् । पहिलो चरणमा थोरै विद्यार्थी रहेका गाउँका विद्यालयहरु खोलिनेछन् । तर, ती विद्यालयमा पनि बाहिरी प्रदेशका शिक्षकहरु नहुँदा पठनपाठन प्रभावित हुनेछ । विकल्पका रुपमा स्थानीय शिक्षित युवाहरुलाई स्वयंसेवक शिक्षकका रुपमा नियुक्ति गर्न प्रदेश र स्थानीय सरकारबीच छलफल चलिरहेको मन्त्री पुनमगरले बताइन् ।

धेरै विद्यार्थी रहेका विद्यालयमा भने विद्यार्थीबीच दूरी कायम गराएर भिन्न सिफ्टमा कक्षा संचालन गर्नेबारे छलफल हुँदैछ । प्रविधिको पहुँच रहेका सहरी क्षेत्रका विद्यार्थीलाई भने मोबाइल, रेडियो र टेलिभिजनबाट अनलाईन कक्षा सञ्चालन गर्न लागिएको छ । प्रदेश बाहिरका शिक्षक भित्र्याउनु र गाउँगाउँमा क्वारेन्टाइनमा परिणत भएका विद्यालयलाई पुरानै स्थितिमा फर्काउनु चुनौती रहेको मन्त्री पुनमगरले बताइन् ।

गण्डकी प्रदेशको बाग्लुङमा २ संक्रमित भेटिए पनि उनीहरु निको भएर घर फर्किसकेका छन् । अन्य जिल्लामा पनि कोरोनाको कम जोखिम रहेको विश्लेषणसहित प्रदेश सरकार लकडाउन खुकुलो पार्ने योजना बनाएको हो । अन्तर्क्रियात्मक भर्चुअल प्रेस मिटमा काठमाडाै‌ं, प्रदेश ५ र गण्डकी प्रदेशका २४ पत्रकार सहभागी थिए ।

सम्बन्धित खबर