बिहिबार, २५ असार २०७७
samadhannews
nepal telecome

भैरहवाबाट ट्याक्सीमा पोखरा आएका थिए कोरोना संक्रमित

शनिबार, २४ जेठ २०७७
91020 पटक पढिएको

अनुप पौडेल
पोखरा, २४ जेठ

पोखराका ५९ वर्षीय कोरोना संक्रमित भैरहवाबाट ट्याक्सी रिजर्भ गरेर पोखरा आएको खुलेको छ । महानगरको जाल्पारोडस्थित लेकसिटी हस्पिटलको क्वारेन्टाइनमा बसेका पोखरा–२७ का ती पुरुषमा शनिबार बिहान कोरोना संक्रमण पुष्टि भएको हो ।

दिल्लीबाट भैरहवा नाकामा आएका ती संक्रमितले त्यहाँबाट ट्याक्सी रिजर्भ गरेर अरु १ जनालाई लिएर पोखरा आएको महानगरको स्वास्थ्य महाशाखाका अधिकृत हरिलाल आचार्यले जानकारी दिए । उनी क्वारेन्टाइनमा अरु ३ जनासँग बसेका छन् ।

ती ३ जनामध्ये २ जना हैदरावादबाट सोही नाका हुँदै जेठ १८ गते नै पोखरा आएका हुन् । बाँकी १ जना भने वृन्दावनबाट भैरहवासम्म छुट्टाछुट्टै र त्यहाँबाट एउटै ट्याक्सीमा पोखरा आएका हुन् । संक्रमितसँगै बसेका अरु ४ जनाको रिपोर्ट भने नेगेटिभ आएको उनले बताए । आचार्यले भने, ‘जेठ १९ गते स्वाब संकलन गर्दा उहाँहरुको नेगेटिभ आयो । ४ जना सँगै बसेकाले फेरि स्वाब परीक्षण गर्दैछौं ।’

शनिबार संक्रमण पुष्टि भएका ती पुरुष पोखराका दोस्रो संक्रमित हुन् । यसअघि काठमाडौंमा उपचाररच पोखरा ८ का ६० वर्षका पुरुषमा शुक्रबार कोरोना पुष्टि भएको थियो ।

डेरामै बेहोस भेटिएपछि हेलिकोप्टरमार्फत पोखराको निजी अस्पतालमा सामान्य उपचार गरेर काठमाडौं लगिएको थियो । काठमाडौं लगिएका ती पुरुषले पोखराका हाइप्रोफाइलसँग सम्पर्कमा आएको सार्वजनिक भएको छ ।

सम्पर्कमा आएकाको खोजी भइरहेको र सबैलाई घरमै सेल्फ क्वारेन्टाइनमा बस्न भनिएको स्वास्थ्य महाशाखा अधिकृत आचार्यले जानकारी दिए । पोखराका २ संक्रमितसहित कास्की जिल्लाभर ४ जनामा संक्रमण देखिएको छ ।

अरु २ संक्रमित रुपा गाउँपालिकाका हंसपुर घर भएका ३२ र २३ वर्षे युवा हुन् । उनीहरु ३ दिन पहिले भारतको हैदराबादबाट गाउँ आएको गाउँपालिका अध्यक्ष नवराज ओझाले जानकारी दिए ।

शनिबार संक्रमण पुष्टि भएका तीनै जनालाई पश्चिमाञ्चल क्षेत्रीय अस्पतालको क्वारेन्टाइनमा राखिएको छ ।

सम्बन्धित समाचार

कसरी संक्रमित भए कास्कीका ६० वर्षे पुरुष, पत्ता लगाउनै मुस्किल !

पोखराका संक्रमित पुरुषको सम्पर्कमा आएका ३५ जना सम्पर्कमा, अधिकांश हाइप्रोफाइल

संक्रमितसंग सम्पर्कमा रहेका व्यक्तीसंगै थिए प्रदेशमन्त्री विकास लम्साल

सम्बन्धित खबर