मङ्गलबार, १२ साउन २०७८
samadhannews
Sanima Bank New year offer

मुस्ताङको थासाङ क्षेत्रमा सलह

मङ्गलबार, १६ असार २०७७


एसके थकाली


जोमसोस


भारतको विभिन्न प्रान्त हुँदै नेपाल भित्रिएको सलह कीरा हिमाली भेगमा पनि पसेको छ । केही दिनअघि तराई हुँदै पहाडी इलाकामा भित्रिएको सलह कीरा मंगलबार दिउँसो मुस्ताङको तल्लो क्षेत्रमा देखिएको हो ।


दक्षिण हावाको प्रभावसँगै फट्याङग्रा प्रजातिको सहल कीरा मुस्ताङ प्रवेश गरेको हुनसक्ने थासाङ गाउँपालिकाका कृषि संयोजक रामशरण सापकोटाले जनाए । उनका अनुसार छिमेकी जिल्ला म्याग्दीका विभिन्न भाग हँुदै सलह कीरा मुस्ताङ पसे पनि त्यसले कृषकको बालीनालीलाई असर नपु¥याएको बताए ।


मंगलबार दिउँसो करिब १२ बजे देखि ४ बजेसम्म सानो बगालमा सलह किरा मुस्ताङको थासाङको सिर्कुम, टिटी लेते, छयो, घाँसा र ताक्लुङ गाउँहरुमा देखा परेको जानकारी दिए । तर थासाङको तल्लोक्षेत्रमा सलह आए पनि कोबाङदेखि माथि उक्लन नसकेको गाउँपालिकाका कृषि संयोजक सापकोटाले उल्लेख गरे ।


थासाङ गाउँपालिका—५ का वडाध्यक्ष सोमल हिराचनले मंगलबार मध्याह्नको समयमा पातलो मात्रामा सलह बथान खेतबारीमा भित्रिएको जानकारी दिए । उनले चिसो मौसम भएको हिमाली जिल्ला मुस्ताङमा तापक्रम बढी भएको स्थानबाट प्रवेश गर्दा आश्चर्यमा परेको जनाए । ठूलो मात्रामा सलह प्रवेश गरे मुस्ताङको स्याउ, मकै, उवा लगायत बालीलाई क्षति पु¥याउन सक्ने उनको भनाइ छ । उनले सलह कीराको असरले पु¥याउने क्षति बारे स्थानीय तहले सजगता अपनाउन आवश्यक भएको बताए ।


मंगलबार तराईदेखि पहाड हँुदै हिमाल उक्लिएको सलह कीरा संकलन गर्न थासाङ—३ लेतेकी मन गौचन सक्रिय बनिन् । उनले दिउँसोको समय खेतबारीमा देखिएका सलह कीरा जम्मा गरेको तस्बिरमा कैद समेत गरेको जनाइन् । उनका अनुसार दिउँसो पसेका सलह कीरा साँझ परेपछि हराउँदै गएको छ । मुस्ताङका कतिपयले सलह कीरा हावाको प्रवाहसँगै उत्तरी कोरलानाका सम्म पुग्ने अनुमान लगाएका छन् ।

मुस्ताङ थासाङ गाउँपालिकामा मंगलबार देखिएको सलह कीरा । तस्बिर : मन गौचन ।

सम्बन्धित खबर