बिहिबार, २९ साउन २०७७
samadhannews
Bardan Online

गण्डकी अस्पताल पुगे ३ दलका नेता

शुक्रबार, १९ असार २०७७
2260 पटक पढिएको

समाधान संवाददाता
पोखरा

नेपाली कांग्रेस कास्कीको नेतृत्वमा जनता समाजवादी पार्टी कास्की र राप्रपा कास्कीका प्रतिनिधि शुक्रबार पोखरा स्वास्थ्य विज्ञान प्रतिष्ठानको समसामयिक अवस्थाको जानकारी लिएको छ ।

पोखरा स्वास्थ्य विज्ञान प्रतिष्ठान मातहत पश्चिमाञ्चल क्षेत्रीय अस्पतालले कोरोना संक्रमितको उपचारमा गरेको व्यवस्था बारे जानकारी लिन र अन्य बिरामीको समस्या बारे जानकारी गराउन ३ दलका प्रतिनिधि अस्पताल पुगेको कास्की कांग्रेसका प्रवत्ता नवीन सिग्देलले बताए ।

टोलीमा कास्की कांग्रेसको तर्फबाट सभापति कृष्ण केसी, सचिव देवेन्द्र रानाभाट, प्रवक्ता नवीन सिग्देल, जनता समाजवादीको तर्फबाट अध्यक्ष गिरिप्रसाद गुरुङ, सचिव नारायणप्रसाद भण्डारी, पोखरा महानगर समिति अध्यक्ष टीकाराम पौडेल र राप्रपा कास्कीका कार्यवाहक सभापति गणेश ढकाल सहभागी थिए ।

छलफलमा नेपाल स्वास्थ्यकर्मी संघ गण्डकी प्रदेश अध्यक्ष नारायण बराल पनि सहभागी थिए ।

छलफलमा कास्की कांग्रेसका सभापति कृष्ण केसीले अस्पताललाई कोरोना अस्पताल बनाउँदा सर्वसाधारण नागरिक सहज र सर्वसुलभ उपचारबाट बञ्चित भएकोप्रति ध्यानाकर्षण गराउँदै कास्की कांग्रेसले कोरोना उपचारका लागि विगतदेखि नै छुट्टै स्थान व्यवस्था गर्न माग गरेको उल्लेख गरे ।

उक्त टोलीलाई प्रतिष्ठानका उपकुलपति डा. बुद्विबहादुर थापा र निर्देशक डा अर्जुन आचार्यले स्वाब परीक्षण र उपचारको अवस्थासहित भावी योजनाहरु जानकारी दिदै अस्पताललाई थप व्यवस्थित बनाउनका लागि सहयोग गर्न आग्रह गरेका थिए ।

प्रतिष्ठानका उपकुलपति डा. थापाले विगतमा धेरै अन्यौल रहे पनि अब भने सहज रुपमा सेवा प्रवाह भइरहेको जानकारी दिए । उनले सबै पक्षसँगको सहकार्य र समन्वयमा काम गरिरहेको बताए ।

निर्देशक डा आचार्यले अबको केही दिनभित्र कोरोना संक्रमितको उपचार छुट्टै स्थानमा गरिने जानकारी दिए । ‘अब पश्चिमाञ्चल क्षेत्रीय अस्पतालसँग कोरोना संक्रमितको सम्पर्क नहुने गरी छुट्टै स्थानको व्यवस्था गरेका छौं, उनले भने, यसले अन्य बिरामीलाई उपचार सेवा लिन सहज हुने अपेक्षा गरेका छौं ।’ कास्की कांग्रेसले शुरुवातको अवस्थादेखि पश्चिमाञ्चल क्षेत्रीय अस्पताललाई कोरोना अस्पताल नबनाउन माग गर्दै आएको थियो ।

सम्बन्धित खबर