मङ्गलबार, २० साउन २०७७
samadhannews
Bardan Online

जोमसोम बजार जोगाउन कालिगण्डकी नदीमा तटबन्ध

सोमबार, २२ असार २०७७
4890 पटक पढिएको

एसके थकाली, जोमसोम

मुस्ताङको महत्वपूर्ण पर्यटकीय ट्रान्जिट प्वाइन्ट जोमसोम बजारको शीरमा बृहत कालिगण्डकी नदी नियन्त्रण गर्न तटबन्ध बन्ने भएको छ । संघीय सरकार अन्तर्गतको राष्ट्रिय योजना आयोगले कालिगण्डकी नदीमा बृहत तटबन्ध निर्माण सुरु गरेको हो ।

आयोगको बहुवर्षीय नदी नियन्त्रण तटबन्ध आयोजना निर्माणको जिम्मा एपेक्स÷अमित जेभीले लिएको हो । तटबन्धको कुल बजेट ९ करोड ५१ लख ३२ हजार भएपनि ठेक्का टेन्डर सम्झौता ९ लाख घटेर कुल ४२ लाख ८६ हजारमा भएको हो । तटबन्ध निर्माणको सम्झौता अवधि १५ महिना छ ।

कालिगण्डकी नदीको वारीपारी दुवै बजारक्षेत्रलाई जोड्ने जोमसोम मोटरेबल पुलदेखि माथि उत्तरतर्फको दुबै भागमा तटबन्ध निर्माण हुने घरपझोङ गाउँपालिकाले जनाएको छ । बजारक्षेत्र जोड्ने उक्त पुल भारतीय राजदुतावासले निर्माण गरेको हो ।

वर्षेनी हुने नदी कटानलाई न्यूनिकरण गर्न पश्चिमतर्फको सशस्त्र प्रहरी बल नेपालको ३३ नम्बर गुल्मदेखि जोमसोम पक्की पुलसम्मको भागमा १ हजार १ सय ५० मिटर र जोमसोम—कोरला सडकको पूर्वतर्फको भागमा ९ सय मिटर लामो तटबन्ध निर्माण हुने इन्जिनीयर सकलदेव शर्माले जानकारी दिए । उनका अनुसार कालिगण्डकी नदीको दुवै क्षेत्रमा बर्खायामको नदीको उच्चबहाव नियन्त्रण गर्नसक्ने २९ वटा स्पर ग्याबिन वाल राखिने छ ।

नदी नियन्त्रणका लागि निर्माण हुने स्पर ९/९ मिटर क्षेत्रफलको फरकमा दुवैतर्फ २९ वटा हुनेछ । स्परको डिपिसी क्षेत्रफल ७५ सेन्टिमिटरको हुने ईन्जिनीयर शर्माले बताए । उनका अनुसार कालिगण्डकी छेक्न निर्माण गरिने सबै स्परको दुरी करिव ४१ मिटरको फरकमा हुनेछ ।

निर्माणधिन तटबन्धको मुख्य फ्रन्ट भागको दुवैतर्फ २०/२० मिटरको आरसीसी पक्की रिटेयरिङ वाल निर्माण गरिने छ । अन्य भागमा पुलको डिजाईन अनुसार थप ३ सय मिटरको आरसीसी वाल निर्माण हुने ईन्जिनीयर शर्माले जानकारी दिए ।

जोमसोम बजारक्षेत्र माथि ठूलो क्षेत्रफलमा कालिगण्डकी नदी फैलिएकाले जोमसोम बजार सुरक्षित रहँदै आएको छ । तर नदीले वर्षेनी दिशा परिवर्तन गरिरहने भएकाले जोमसोम बजार क्षेत्र उच्चजोखिममा रहेको मुस्ताङका संघीय सांसद प्रेमप्रसाद तुलाचन बताउँछन् ।

बृहत तटबन्ध निर्माणपछि जोमसोम बजार क्षेत्रसहित सरकारी स्वामित्वमा रहेका सयौं रोपनि जग्गा संरक्षण हुने सांसद तुलाचनको भनाइ छ ।

यसअघि जोमसोम बजार जोगाउन जलउत्पन्न प्रकोप नियन्त्रण तथा सिँचाई सब डिभिजन कार्यालय स्थानीय तह र कालिगण्डकी करिडोर सडक लगायतले जोमसोम मोटरेबल तलको आवश्यक पर्ने स्थानमा तटबन्ध निर्माण गर्र्दै आइरहेका छन् ।

घरपझोङ गाउँपालिकाको ३ र ४ वडामा विभिन्न पर्यटक लक्षित होटल, कार्यालय, सुरक्षा निकायको क्याम्प, एअरपोर्ट, बैंक तथा वित्तिय संस्था, शैक्षिक संस्था आदी छन् ।

सम्बन्धित खबर