शुक्रबार, ३० साउन २०७७
samadhannews
Bardan Online

छन्त्यालकाे ठाउँमा गुल्मीकी ज्वारचनलाई सांसद बनाइने

मङ्गलबार, २३ असार २०७७
2430 पटक पढिएको

पाेखरा

नेपाली कांग्रेसले समानुपातिकतर्फ रिक्त प्रतिनिधिसभा सदस्य पदमा सुवर्ण ज्वारचनलाई पठाउने निर्णय गरेको छ ।

गुल्मी निवासी ज्वारचन पुष्पकमल दाहाल नेतृत्वकाे सरकारमा कांग्रेसको तर्फबाट सहरी विकास राज्यमन्त्री थिइन्।

सोमबार बसेको कांग्रेस केन्द्रीय समिति बैठकले रिक्त पदमा ज्वारचनलाई पठाउने निर्णय गरेको हो । समानुपातिकतर्फ प्रतिनिधिसभा सदस्य ज्ञानकुमारी छन्त्यालको गत बुधबार निधन भएपछि उनको ठाउँ रिक्त थियो ।

कांग्रेस नेता गोपालमान श्रेष्ठले समानुपातिकतर्फ रिक्त सदस्य पदमा ज्वारचनलाई पठाउने निर्णय भएको बताए । उनले निर्वाचन आयोगमा बुझाएको समानुपातिकतर्फको महिला (जनजाति) सूचीमा छन्त्यालपछि ज्वारचनको नाम रहेकाले उनलाई नै सो पदमा पठाइने निर्णय भएको जानकारी दिएका हुन् ।

‘समानुपातिकतर्फ प्रतिनिधिसभा सदस्य ज्ञानकुमारी छन्त्यालको गत बुधबार निधन भएपछि उनको स्थान रिक्त थियो, सो पदमा ज्वारचनलाई पठाउने बैठकको निर्णय होे, रोलक्रममा उहाँकै नाम भएकाले निर्णय गरियो,’ नेता श्रेष्ठले भने ।

प्रतिनिधिसभा सदस्य निर्वाचन नियमावलीअनुसार कुनै सांसदको निधन भए बन्दसूचीमा रहेको व्यक्ति नै सांसद हुन्छन् । सांसद निधन भएको जानकारी संघीय संसद् सचिवालयले आयोगलाई दिएपछि सोहीअनुसार निर्वाचन आयोगले पत्र पठाएको थियो ।

सांसदको निधन भएकोबारे कांग्रेसले पनि आयोगलाई जानकारी गराएको थियो । ज्वारचन २०३६ सालको जनमत संग्रह, सत्याग्रह र जनआन्दोलनमा सक्रियतापूर्वक भाग लिँदै कांग्रेसमा सक्रिय राजनीतिमा रहँदै आएकी छन् ।

सम्बन्धित खबर