शुक्रबार, ३० साउन २०७७
samadhannews
Bardan Online

डेढ सय केन्द्रीय सदस्यले मागे नेकपा केन्द्रीय बैठक

बुधबार, १४ साउन २०७७
1730 पटक पढिएको

काठमाडौं

सत्तासीन नेपाल कम्युनिस्ट पार्टी (नेकपा)मा उत्पन्न विवादका क्रममा केन्द्रीय बैठकको माग भएको छ । अध्यक्षद्वयलाई सम्बोधन गर्दै केन्द्रीय सदस्यले केन्द्रीय समितिको बैठक माग गर्दै पत्र बुझाएका छन् ।

पार्टीमा विवाद चर्किदै गएपछि केन्द्रीय समितिको माग गर्दै नेता पार्टी मुख्यालय धुम्बाराही पुगेर पत्र बुझाएका हुन् । धुम्बाराहीस्थित पार्टी मुख्यालय पुगेर १५२ जना केन्द्रीय सदस्यको हस्ताक्षरसहितको पत्र केन्द्रीय कार्यालयका सचिव श्रीराम ढकाललाई बुझाइएको हो । हस्ताक्षर बुझाउन ठाकुर गैरे, हिमाल शर्मा लगायत केन्द्रीय सदस्य धुम्बाराही पुगेका थिए ।

प्रधानमन्त्री ओली जारी स्थायी समिति बैठक रोकेर महाधिवेशनमा केन्द्रित भएको भन्दै केन्द्रीय सदस्यले आपत्ति जनाएका छन् । नेकपाको विधान अनुसार २५ प्रतिशत केन्द्रीय सदस्यले बैठक माग गरे एक महिनाभित्र बोलाउनुपर्ने हुन्छ । ४४१ केन्द्रीय सदस्यको २५ प्रतिशत ११२ जना हुन्छ ।

नेकपाको विधानको धारा ५९ (४) अनुसार कमिटीका २५ प्रतिशत सदस्यहरूले लिखित माग गरेको खण्डमा केन्द्रीय कमिटीको बैठक एक महिनाभित्र र मातहत कमिटीको बैठक १५ दिनभित्र बोलाउनुपर्नेछ ।

४ सय ४१ सदस्यीय केन्द्रीय कमिटमा बैठक बोलाउन १ सय १० जना सदस्यको हस्ताक्षर आवश्यक पर्छ । नेकपाको केन्द्रीय कमिटीको बैठक गत माघ १५ गतेदेखि १९ गतेसम्म बसेको थियो । विधानको धारा ५९ (१) अनुसार केन्द्रीय कमिटीको बैठक ६/६ महिनामा बस्नुपर्नेछ । जारी स्थायी कमिटी बैठक पनि सदस्यहरूले माग गरेरै बोलाइएको हो ।

अध्यादेश प्रकरणपछि वैशाख १० गते स्थायी कमिटीका २० जना सदस्यले बैठक माग गर्दै हस्ताक्षर बुझाएका थिए ।

सम्बन्धित खबर