मङ्गलबार, १३ असोज २०७७
samadhannews
Bardan Online

प्रमुख सचिव नेपालको स्वागत

सोमबार, १९ साउन २०७७

समाधान संवाददाता
पोखरा

गण्डकी प्रदेशका मुख्यमन्त्री पृथ्वीसुव्वा गुरुङ लगायत मन्त्री तथा कर्मचारीले प्रमुख सचिव विष्णुप्रसाद नेपाललाई स्वागत गरेका छन् । कार्यालयमा आयोजित कार्यक्रममा मुख्यमन्त्री गुरुङले नेपाललाई स्वागत गर्दै सफल कार्यकालको कामना समेत गरे ।

कार्यक्रममा मुख्यमन्त्री गुरुङले सरकारको सफलता कर्मचारी प्रशासनको कार्यसम्पादनमा निर्भर हुने बताए । उनले सरकारका नीतिगत निर्णयलाई कार्यान्वयनमा लैजाने दायित्व र जिम्मेवारी कर्मचारी प्रशासनमा रहने भन्दै त्यही अनुसारको सहयोगको अपेक्षा गरे ।

राम्रो काम गर्ने कर्मचारीको उचित मूल्यांकन हुने भन्दै मुख्यमन्त्री गुरुङले हुने बताउँदै जनताका अपेक्षालाई सम्बोधन गर्ने गरी क्रियाशील बन्नुपर्नेमा जोड दिए । जनताले चाहे अनुसार सार्वजनिक प्रशासन छिटोछरितो एवं पारदर्शी हुनुपर्ने उल्लेख गर्दै मुख्यमन्त्री गुरुङले प्रदेशको समग्र विकासका लागि दक्ष जनशक्ति आवश्यक भएको बताए ।

प्रमुख सचिव नेपालले आफ्नो योग्यता तथा दक्षतालाई अधिकतम उपयोग गर्दै सरकारका कामको प्रभावकारिता बढाउन लाग्ने धारणा व्यक्त गरे । सरकारको सफलताका लागि सबैको साथ र सहयोग आवश्यक हुने बताउँदै उनले जिम्मेवारी आत्मसात् गर्दै क्रियाशील बन्न कर्मचारी वर्गलाई आग्रह गरे ।

मन्त्रीहरु रामशरण बस्नेत, हरिबहादुर चुमान, विकास लम्साल, लेखबहादुर थापा, नरदेवी पुन मगरले प्रमुख सचिव नेपाललाई स्वागत गरे । मुख्यमन्त्री तथा मन्त्रिपरिषद कार्यालयका सचिव, मन्त्रालय, प्रदेश प्रमुखको कार्यालय, प्रदेश सभासचिवलायका सचिवले पनि उक्त अवसरमा स्वागत गरे ।

सम्बन्धित खबर