मङ्गलबार, १३ असोज २०७७
samadhannews
Bardan Online

क्षेत्रीय अस्पतालको प्रसूति सेवा आज र भोलि बन्द

बुधबार, ३१ भदौ २०७७

समाधान संवाददाता, पोखरा

पश्चिमाञ्चल क्षेत्रीय अस्पतालको प्रसूति सेवा २ दिनलाई बन्द गरिएको छ । २७ भदौमा इमर्जेन्सी सिजरिङ गरिएकी तनहुँको शुक्लागण्डकी नगरपालिका १० बस्ने २४ वर्षीया महिलामा कोरोना पुष्टि भएपछि बिहीबारसम्मलाई प्रसूति सेवा बन्द गरिएको हो ।

कोरोनाको आशंकामा ती महिलाको आइतबार स्वाब संकलन गरिएकोमा मंगलबार पोजेटिभ आएको हो । प्रसूति विभागलाई निर्मलीकरण गर्नुपर्ने र ती महिलाको अप्रेसनमा संलग्न स्वास्थ्यकर्मीको कोरोना परीक्षण गर्नुपर्ने भएकाले सेवा बिहीबारसम्मलाई बन्द गरिएको अस्पतालका निर्देशक डा. अर्जुन आचार्यले जानकारी दिए ।

अस्पतालबाट प्रवाह हुने अन्य सेवा भने यथावत सञ्चालन हुने उनले बताए । सुत्केरी महिलालाई अस्पताल परिसरमै निर्मित आइसोलेसनमा सारिएको छ । संक्रमित युवतीको अवस्था सामान्य रहेको आइसोलेसन इन्चार्ज रत्ना श्रेष्ठले जानकारी दिइन् ।

‘उहाँको अवस्था सामान्य छ । सास फेर्न गाह्रो भएपछि परीक्षण गर्दा पोजेटिभ आएछ । मैले बहिनीसँग कुरा गरेको थिएँ । बच्चालाई घर लैजानुभएछ,’ श्रेष्ठले भनिन् ।

आइसोलेसनमा २७ जनाको उपचार भइरहेको छ । तीमध्ये ७ जनालाई आइसियुमा राखेर उपचार भइरहेको श्रेष्ठले बताइन् । क्षेत्रीय अस्पतालमा ४२ बेडको आइसोलेसन छ ।

सम्बन्धित खबर