मङ्गलबार, १३ असोज २०७७
samadhannews
Bardan Online

रुप्सेको बाढीले डाइभर्सन बगाएपछि बेनी-जोमसोम सडक अवरुद्ध

बुधबार, ३१ भदौ २०७७

एसके थकाली, जोमसोम

निर्माणधिन राष्ट्रिय गौरवको बेनी—जोमसोम ७६ किमी सडक अन्र्तगत म्याग्दीको अन्नपूर्ण गाउँपालिका—३ रुप्से खोलामा सडक डाइभर्सन बाढीले बगाउँदा बेनी—जोमसोम सिधा यातायात सम्पर्क अवरुद्ध भएको छ ।

बर्खायामको गत श्रावण ५ को रुप्से झरनाको बाढीले साविक रुप्सेमा सडक बगाएको थियो । उक्त सडकको केही तलबाट करिडोर तथा शर्मा गजुरमुखि जेभीले अर्को डाइभर्सन सडक निर्माण गरी ट्रयाक सञ्चालनमा ल्यायो । तर, निरन्तरको वर्षाले उक्त डाइभर्सन सडक पनि सोमबार दिउँसो आएको बाढीले बगायो ।

त्यसलाई पुनः स्तरोन्नति गर्ने काम पुरा हन नपाउँदै फेरि मंगलबार मध्यराति आएको रुप्से खोलाको बाढीले अन्दाजी २५ मिटर डाइभर्सन सडक बगाएको निर्माण कम्पनीका सडक सुपरभाईजर ईन्द्रसिंह शेरचनले जानकारी दिए ।

यसअघि बेनी—जोमसोम सडकको दर्जनौ स्थानमा बाढीपहिरो र नदी कटानले सडक संरचना पुरिने र भासिएपछि झन्डै डेढ महिनासम्म सिधा सम्पर्क अवरुद्ध भएको थियो । मुस्ताङको थासाङ—४ घोप्टेभीर, कैकु, घाँसा र लेते खोलामा अविरल वर्षाले त्यससमय सडकमा क्षति पुगेको थियो ।

म्याग्दीको अन्नपूर्ण गापाको तातोपानी, गुईठे, बेगखोला, रुप्से र म्याग्दी र मुस्ताङको सिमाना काभ्रेभीर लगायतका स्थानमा बाढी÷पहिरो र नदी कटानले सडक अवरुद्ध भएको थियो । करिडोर, निर्माण कम्पनी, स्थानीय, जनप्रतिनिधि, प्रशासन र सुरक्षा निकायको अथक प्रयासपछि बेनी÷जोमसोम सडक सञ्चालनमा आएको थियो ।

बेनी—जोमसोम सिधा यातायात सञ्चालन भएको ३ सातापछि फेरि म्याग्दी रुप्सेमा बाढीले सडक अवरुद्ध भएको आयोजनाका सवईन्जिनीयर किरण घिमिरेले जानकारी दिए । अविरल वर्षाका कारण पटकपटक आएको बाढीपहिरोले बेनी-जोमसोम सडक सास्ती भएको उनले बताए ।

रुप्सेमा आएको बाढीले डाइभर्सन सडकमा क्षति पुगेपछि अलपत्र परेका मालबहाक सवारी । तस्विर : ईन्द्रसिंह शेरचन

गए रातिको रुप्से खोलाको बाढीले पैदलयात्री आउजाउ गर्ने काठको साँघो समेत बगाएकाले पैदलयात्री वारपार गर्न समस्या बनेको उनले जानकारी दिए । सवइन्जिनियर घिमिरेले रुप्से खोलामा पानी बहाव उच्च भएकाले सडक सुचारु गर्न अप्ठ्यारो परेको र पानीको बहाव नघटेसम्म काम गर्नसक्ने अवस्था नरहेको उल्लेख गरे ।

बाढीले करिव एक सय मिटर सडकमा क्षति पुगेको र करिव २५ मिटर सडकमा काम गर्न कठिन परेको सवइन्जिनियर घिमिरेले सुनाए । उनले भने, ‘पानी घटेपछि काम सुरु गर्छौं । सडक खोल्न कति दिन लाग्छ अहिलेनै एकिन गर्न सकिदैन ।’ निर्माण कम्पनीका २ वटा सडक खुलाउने उपकरण स्पोर्टमा रहे पनि काम गर्ने अवस्था नरहेको करिडोर आयोजनाले जनाएको छ ।

म्याग्दीको रुप्से खोलामा डाइभर्सन सडक बगाएपछि मुस्ताङ आउजाउ गर्ने खाद्यान्न, निर्माण समाग्री बोकेका मालवाहक र पेट्रोलियम पदार्थ बोक्ने ट्रक र ट्याक्टर लगायतका सवारी सडकमै अलपत्र परेका छन् ।

सडक सुपरभाइजर शेरचनले मुस्ताङतर्फ आउँदै गरेका २ दर्जन मालवाहक सवारी बाटोमा रोकिएको जानकारी दिए । सरकारले मंगलबार लामोदुरीको यातायात संञ्चालन गर्ने भनिए पनि रुप्सेको बाढीले सिधा यातायात तत्कालै खोल्ने अवस्था नरहेको हो ।

यसअघि बर्खायामको बाढी-पहिरो र नदी कटानले बेनी÷जोमसोम सडक अवरुद्ध हुँदा मुस्ताङमा खाद्यान्न र पेट्रोलियम पदार्थ अभाव हुदाँ समस्या उत्पन्न भएको थियो । त्यस समय मुस्ताङमा निर्माण समाग्री ढुवानी रोकिँदा विकास निर्माणका काम समेत प्रभावित बनेको थियो ।

सम्बन्धित खबर