बुधबार, ०५ कार्तिक २०७७
samadhannews
Baba Hardware Header add

शंकाको घेरामा एन्फा एकेडेमी

सोमबार, ०३ कार्तिक २०७७

सम्पादकीय

अखिल नेपाल फुटबल संघ (एन्फा) ले कास्कीको माछापुच्छ्रे गाउँपालिकाको भेंडाबारीमा बहुउद्देश्यीय ट्रेनिङ सेन्टर बनाउने योजना अगाडि सारेको छ ।

यसका लागि धेरैजसो सार्वजनिक र केही निजी जग्गा उपलब्ध गराउन गाउँपालिका पनि तयार भएको छ ।

अब छिटै नै निर्माणको काम सुरु हुने भनेर स्थानीय पनि उत्साही छन् । तर निर्माणको काम सुरु गर्नुभन्दा अगाडिका धेरै प्रक्रिया पूरा हुनै बाँकी छन् ।

आफै विवादको घेरामा परेको एन्फाले यो प्रस्तावलाई अझै औपचारिक रुपमा फिफामा पु-याएकै छैन । जबकि यो महात्वाकांक्षी योजनामा फिफाले नै लगानी गर्ने हो ।

माछापुच्छ्रेमा यति महत्वको योजना बन्नु निकै गौरवको विषय हो । तर पुग्नुपर्ने जति प्रक्रिया नपुग्दै धेरै हल्लीखल्ली गर्नु पनि राम्रो होइन ।

एन्फाका वर्तमान अध्यक्ष कर्माछिरिङ शेर्पा चुनावी मैदानमा रहेकै बेला ७ प्रदेशमा १४ वटा तालिम केन्द्र बनाउने प्रतिबद्धता जनाएका थिए ।

त्यही प्रतिबद्धता अनुसार यो केन्द्र बन्न लागेको हो । खेलकुद मन्त्रीको निर्वाचन क्षेत्र भएकाले पनि यो योजना त्यहाँ परेको हुनसक्छ ।

अन्तर्राष्ट्रिय प्रतियोगिता गर्न मिल्ने गरेर सेन्टरलाई ४ चरणमा सक्ने प्रारम्भिक योनना छ । सेन्टरमा मैदान, होस्टेल, जिम हल, गेस्ट रुम, स्विमिङ पुल, पुस्तकालय रहने भनिएको छ ।

फिफाले एन्फाका लागि पठाएको २० लाख डलरबाट उक्त सेन्टर बनाउने योजना एन्फाको छ । पहिलो चरणका कामका लागि १७ करोड रुपैयाँ प्रयोग गर्ने निधो पनि भइसकेको एन्फाकै पदाधिकारीले बताएका छन् ।

मर्दी र इदी खोलाको बीचमा रहेको उक्त ठाउँमा कटानको निकै जोखिम छ । कटानबाट जोगाउनका लागि एन्फा अध्यक्ष शेर्पाले प्रदेश सरकारसँग आग्रह गरेका छन् ।

त्यही आग्रह अनुसार मुख्यमन्त्री पृथ्वीसुब्बा गुरुङसहितको टोली स्थलगत अनुगमनमा पनि गएको छ ।

तटबन्धको जिम्मा प्रदेश सरकारले लिएर भेंडाबारीमा जसरी भए पनि एन्फा एकेडेमी चलाएर छाड्ने प्रतिबद्धता मुख्यमन्त्री गुरुङले जनाएका छन् ।

तटबन्धका लागि यो वर्ष बजेट विनियोजन नभए पनि खोजखाज गरेरै मिलाउने बताएपछि स्थानीय पनि हर्षित भएका छन् ।

प्रदेश सरकारको सहयोगमा तटबन्ध भइहाले पनि सेन्टर निर्माणको काम अगाडि भने बढ्ने अवस्था छैन । एन्फाका कुनै पनि योजना बन्नु अगाडि साधारणसभाबाट पास हुनुपर्छ ।

कोरोना महामारीका कारण एन्फाको साधारणसभा बस्नै सकेको छैन । जिल्लाबाट यो एकेडेमीको प्रस्ताव केन्द्रमा गएको पनि छैन । प्रस्तावै नपुगी पारित हुने छ कुरै छैन ।

एन्फाको साधारणसभाले पास गरिहालेपनि फिफाको स्वीकृति पर्खनु पर्ने हुन्छ काम सुरु हुनका लागि ।

एन्फाको साधारणसभाबाटै पारित नभएको प्रस्तावमा फिफाले स्वीकृति दिने त कुरै भएन । यो विषयमा एन्फाकै कार्यसमितिबीच ठूलै विवाद छ ।

कार्यसमितिमा थाहै नदिई अध्यक्ष शेर्पाले एकलौटी ढंगले योजना ल्याएको भन्दै उनको आलोचना भइरहेको छ ।

पर्यटकीय केन्द्र पोखराको नजिकै अनि माछापुच्छ्रे हिमालको काखमा यति महत्वको योजना बनेको खण्डमा गाउँपालिका मात्र होइन समग्र कास्कीको विकासमा यो कोषेढुंगा सावित हुनसक्छ ।

माछापुच्छ्रे क्षेत्र खेलकुद पर्यटनको केन्द्र बन्न सक्छ । देशविदेशका खेलाडी, प्रशिक्षकहरु हिमालको चिसो हावामा खेलकुदको आनन्द लिन सक्छन् । तर योजनाले मूर्तरुप लिन नपाउँदै अनि प्रक्रिया सुरु नहुँदै गरिएको हल्लीखल्लीले स्थानीयलाई पछि निराश पार्छ कि भन्ने आशंका उब्जेको छ ।

यसमा सरोकारवालाको बेलैमा ध्यान जाओस् ।

सम्बन्धित खबर