शुक्रबार, १९ मङि्सर २०७७
samadhannews
Baba Hardware Header add

अस्पतालहरु उपचार गर, अपराध नगर

आइतबार, ०७ मङि्सर २०७७

सम्पादकीय

कोरोना भाइरस रोग कोभिड १९ को आतंक जनतामा छँदैछ, यही आतंकको आगोमा निजी अस्पतालहरु अकुत पैसा कमाउने धन्दा गरिरहेका छन् ।

अहिले निजी अस्पताल बिरामीको गोजी हेरेरमात्रै उपचारका लागि भर्ना लिन्छन्, होइन भने बेड छैन भन्ने बहानामा बिरामी नै लिँदैनन् ।

बिहीबार त्यस्तै भयो, स्याङ्जाबाट आएर पोखरा बुद्धचोक बस्दै आएकी धनमाया गुरुङले मृत्युवरण गर्नुको कारण यहाँका अस्पतालहरुले भर्ना नलिनु थियो ।

वास्तवमा बिरामीलाई उपचार गर्दिन भन्ने हक अस्पतालहरुलाई हुँदै हुँदैन । अपराधी नै भए पनि उपचार गर्ने कर्तव्य अस्पताल र स्वास्थ्यकर्मीहरुको हो ।

बरु उपचार नगर्नुचाहिँ अपराध हो । धनमाया गुरुङले उपचार नपाएर मर्नुपरेको दोष अरु कसैको होइन उनी भर्ना हुन गएका पोखराका निजी अस्पताहरु मेट्रोसिटी, जिएमसी, चरक, फेवासिटी र मनिपालको हो ।

ती सबैकहाँ पुग्दा कसैले पनि भर्ना नलिएपछि बिहीबार राति घर फर्किंदै गर्दा उनको ज्यान गयो । वास्तवमा उनको मृत्यु केवल एक व्यक्तिको मृत्यु होइन, अस्पतालहरुको कर्तव्यको मृत्यु, धर्मको मृत्यु र नैतिक दायित्वको मृत्यु हो ।

यो घटनाको उचित छानबिनको आवश्यकता र दोषी अस्पतालहरुमाथि कडाभन्दा कडा कारबाही राज्यले गर्नुपर्छ ।

गण्डकी प्रदेश सरकारले निजी अस्पतालहरुमा पनि कोरोना संक्रमित बिरामीको उपचारको व्यवस्था मिलाउने भनेको थियो । धनमायालाई कोरोना थियो वा थिएन पनि जाँच भएन ।

अस्पतालहरु त्यसै सशंकित भएर दायित्वबाट उम्किए । अरु कुनै पनि कोरोना संक्रमित बिरामी पनि निजी अस्पतालहरु लिन मान्दैनन् ।

लिइहाले भने बिरामीले तिर्नुपर्ने दैनिक बेड शुल्क नै बिसौं हजारको हुने गरेको छ । जुन कुनै पनि सर्वसाधारणले थेग्न सक्दैनन् ।

राज्यले कोभिड १९ को उपचार निशुल्क गर्ने भनेको छ तर, सरकारी अस्पतालमा ठाउँ नहुने र निजीमा थेग्नै नसक्ने शुल्क लाग्ने बिडम्वनापूर्ण अवस्था छ ।

सरकारले पश्चिमाञ्चल क्षेत्रीय अस्पताललाई कोरोनाको डेडिकेटेड अस्पताल त घोषणा ग¥यो तर, त्यहाँ ५० जना बिरामी पनि राख्न नसक्ने आइसोलेसन बनायो ।

वास्तवमा डेडिकेटेड अस्पतालको क्षमता अझै विस्तार गर्नुपर्छ । उता प्रदेशले संक्रामक रोग उपचार गर्ने भनेर सिसुवामा बनाएको अस्पतालमा आजका दिनसम्म पनि कुनै पूर्वाधार बनाउन नसक्नु अर्काे बिडम्वना हो । संघ सरकारलाई चुनौती दिइरहने प्रदेशले कम्तीमा आफ्नो अस्पताल पूर्वाधारयुक्त बनाउन सक्नुपथ्र्याे र पर्छ पनि ।

थेग्नै नसकेर भन्दा पनि नचाहेर इच्छाशक्ति नभएका कारण आज राज्यले स्वास्थ्य सेवा सहज बनाउन नसकेको छर्लंग छ ।

यति ठूलो आपत आइलाग्दा पनि नचेत्ने राजनीतिक नेतृत्वको मूल्यांकन आउँदो चुनावमा मात्रै गरेर पुग्दैन, नागरिक समाज, बुद्धिजीवी र सरोकारवाला सबैले आजैका दिनमा दबाब दिन जरुरी छ ।

उत्तरदायी बनाउन जरुरी छ । होइन भने जनतालाई जसो गरे पनि हुन्छ, यिनको जिउज्यानको कुनै मूल्य छैन भन्ने मनोभावना राजनीतिक नेतृत्वमा विकास हुन्छ, भोलिका दिनमा अझै ठूलो विपत्ति सामाना गर्नुपर्ने दिन आउनेछ ।

सम्बन्धित खबर