शनिबार, ०३ माघ २०७७
samadhannews
Baba Hardware Header add

जस लिने होड

शुक्रबार, १९ मङि्सर २०७७

समाधान संवाददाता, पोखरा

सत्तारुढ नेपाल कम्युनिस्ट पार्टी (नेकपा) भित्रको विवादका कारण तातेको नेपाली राजनीतिको पारो तनहुँ बुल्दी पुल उद्घाटन प्रकरणले झनै तताएको छ ।

प्रमुख प्रतिपक्षी दल नेपाली कांग्रेस सुसुप्त भयो भन्ने आवाज आइरहेका भएको यो घटनाले कांग्रेस र कम्युनिस्ट दुवै दलका कार्यकर्तालाई कुनै न कुनै रुपमा सशक्त हुने अवसर दिएको ।

चाहे त्यो समर्थनमा या विरोधमा । सधैं कांग्रेसभित्रकै विवादले चर्चामा आउने गरेको तनहुँले पनि २ दल बीचको विवादलाई छरपस्टै पार्ने मौका पाएको छ ।

तनहुँ सदरमुकाममा ३ वर्षअघि नै बनिसकेको पुल उद्घाटनको विषयलाई किन यति ठूलो राजनीतिक विषय बनाइयो ?

यसको अनुसन्धान गर्दै गरौंला । कसरी सुरु भयो त विवाद भन्ने त प्रस्टै छ । कुनै बेला कांग्रेसको एकछत्र प्रतिनिधित्व रहेको तनहुँमा गएको संघीय निर्वाचनमा परिणाम उल्टो आयो ।

कांग्रेसका शीर्ष नेता रामचन्द्र पौडेललाई हराउँदै कृष्णकुमार श्रेष्ठ विजयी भए । प्रधानमन्त्रीको दाबेदारी गरिरहेका नेता पौडेललाई हराउनु नै उनको राजनीतिक जीवनको ठूलो सफलता हो ।

व्यवसायमा रमाइरहेका कृष्णकुमार सांसद बनिसकेपछि जिल्ला भित्रै कांग्रेसको कमजोरीमा खेल्न थाले ।

व्यक्तिगत र दलकै राजनीतिक सफलताका लागि यो जरुरी थियो र छ पनि । यही कमजोरीमा खेल्न खोज्दा बुल्दी खोला पुल उद्घाटन प्रकरण छरपस्ट भएको हो ।

केही दिनदेखि गृहजिल्लामारहेका कांग्रेस नेता पौडेलले मंगलबार व्यास नगरपालिका १४ र रिसिङ गाउँपालिका ३ जोड्ने गरी सेती नदीमाथि बनेको पुल उद्घाटन गरेपछि नेकपा कार्यकर्ता रुष्ट थिए ।

सांसद श्रेष्ठ उक्त पुलको उद्घाटन गर्न चाहन्थे । कांग्रेस नेता पौडेलले व्यास नगरपालिकाको बुल्दी खोलामाथि बनेको पुल बुधबार उद्घाटन गर्ने कार्यक्रम थियो ।

तत्कालीन जिविसको एसएनआरटिपी परियोजनाअन्र्तगत २०७३ वैशाखबाट पुल निर्माण सुरु भएको थियो । २ करोड ५४ लाख रुपैयाँमा निर्मित पुलको काम पोहोर साल नै सकिए पनि उद्घाटन भएको थिएन ।

कांग्रेस नेताले पुल उद्घाटन गर्ने भनेपछि नेकपालाई चित्त बुझेन । त्यही विषयमा नेकपानिकट युवाहरुले दमौलीमा प्रदर्शन गरे ।

पुल निर्माण गर्ने उपभोक्ता समितिले भने कांग्रेस नेता पौडेलबाटै उद्घाटन गर्ने अडान लियो ।

त्यही अडानले झडपको स्थिति सिर्जना हुने भन्दै जिल्ला प्रशासन कार्यालयले बुधबार मध्याह्न १२ बजेदेखि ६ घन्टे निषेधाज्ञा जारी गरेको थियो ।

निषेधाज्ञाबीच नै दलबलसहित उद्घाटन गर्न पुगेका नेता पौडेललाई प्रहरीले नियन्त्रणमा लिएर ३ घन्टा राख्यो ।

बुल्दी पुल प्रकरण नेपालको विकास प्रणाली र राजनीति चरित्रको ऐना हो । पुलपुलेसा, बाटोघाटो बनाइदिएर र त्यसैलाई देखाएर राजनीतिक सफलता प्राप्त गर्न सकिन्छ भन्ने विश्वासमा दलहरु अडिएकै कारण यो घटना भएको हो ।

हो भौतिक संरचना विकासको मुख्य आधार हो । तर २१ औं शताब्दीमा आइसक्दा दलहरुले देखाउनु पर्ने विकासको मोडल फेरिएको हुनुपर्ने थियो ।

रोजगारी सिर्जनादेखि उत्पादकत्व वृद्धिसम्मको भिजन भाषणमा सीमित छन् । चुनावका बेला असाध्यै प्रगतिशील नारा लगाउने दलहरु नै विकासका नाममा परम्परागत प्रक्रिया अपनाउन छाडेका छैनन् ।

पुल बनाउने, उद्घाटन दिने त्यहिँ जम्मा भएका कार्यकर्तालाई भाषण सुनाएर कहिलेसम्म नेताहरुले आत्मसन्तुष्टि लिने ?

उमेर पाकेका नेताहरुले सत्ता र दलको कुर्सी नछाड्ने प्रवृत्तिका कारण पनि यी र यस्ता परिणाम निम्तेका हुन् ।

काम गरौं, विकास निर्माणलाई पनि निरन्तरता दिनैपर्छ । तर उद्घाटन गर्दा आनन्द मान्ने नपाउँदा ठुस्सिने प्रवृत्ति त्याग्नै पर्छ ।

सम्बन्धित खबर