बिहिबार, ०८ माघ २०७७
samadhannews
Baba Hardware Header add

हिउँ छिचोल्दै सीमामा सशस्त्रको गस्ती

बुधबार, २२ पुष २०७७

एसके थकाली, जोमसोम

तिब्बतसँग सीमाना जोडिएको कोरला नाका आसपासमा उपल्लो मुस्ताङको छोसेर, नेचुङमा रहेको सशस्त्र प्रहरी बोर्डर आउट पोस्ट (बिओपी) का सुरक्षाकर्मीले गस्ती गरेका छन् । मंगलबार सेताम्मे हिउँको परवाह नगरी उनीहरुले नियमित गस्ती गरेका हुन् ।

बिओपी कमान्डर सुजन रानाभाट नेतृत्वमा २० सुरक्षाकर्मीले गस्तीलाई निरन्तरता दिएको सशस्त्र प्रहरी बल ३३ नं. गुल्मका सशस्त्र डिएसपी मोहनजंग कार्कीले जानकारी दिए । तिब्बतसँग सीमाना जोडिएका १६ सीमा स्तम्भको समय तालिका मिलाएर गस्ती गर्ने गरिएको छ ।

लोमान्थाङ र लोघेकर दामोदरकुण्ड गाउँपालिकामा हिउँ परेको छ ।

उपल्लो मुस्ताङको तापक्रम अहिले माइनस २० डिग्रीमा झरेको छ ।

चिसो अत्यधिक बढे पनि सीमारक्षाका लागि १२ महिनै खटिनुपर्ने बाध्यता सुरक्षाकर्मीलाई छ । मौसम प्रतिकूल हुँदा सञ्चार सम्पर्क विच्छेद हुने गरेको छ ।

बिजुलीको केन्द्रीय प्रशारण लाइन नहुँदा सौर्य ऊर्जाकै भर पर्नुपर्ने हुन्छ । बिहान र बेलुकी थेग्नै नसक्ने चिसो र हावाहुरीले सुरक्षाकर्मीलाई झनै सास्ती हुन्छ । नेचुङका सुरक्षाकर्मी बिहान र बेलुकी मट्टीतेलबाट बल्ने हिटर ताप्छन् ।

गत जेठमा लोमान्थाङको नेचुङमा बिओपी स्थापना भएको थियो । डिएसपी कार्कीले प्रदेश सशस्त्र मुख्यालय पोखराबाट बिओपीका सुरक्षाकर्मीलाई जाडो छल्ने न्याना कपडा उपलब्ध भएको जानकारी दिए ।

उपल्लो मुस्ताङमा मंगलबार हिमपात भएको छ । यसअघि मंसिर १ गते सिजनको पहिलो हिमपात भएको थियो । उपल्लो मुस्ताङमा हिमपात भए पनि तल्लो मुस्ताङका वारागुङ मुक्तिक्षेत्र, घरपझोङ र थासाङ गाउँपालिकामा हिउँ परेन ।

हिउँ परेपछि उपल्लो मुस्ताङका किसान उत्साहित बनेका छन् । तर तल्लो मुस्ताङमा किसान हिउँको पर्खाईमा छन् ।

तल्लो मुस्ताङमा हिउ नपरे पनि चिसो भने अत्यधिक बढेको जोमसोमका अजित थकालीले बताए । हिउँ परेपछि किसानको खेतबारीको बालीनाली सप्रिने गर्छ । हिउँले जमिन सिञ्चित गर्ने र बालीनालीमा विभिन्न प्रकारका प्रकोप नियन्त्रण गर्ने हुनाले हिउँ किसानका लागि बरदान सावित हुने थकालीले उल्लेख गरे ।

अहिले चिसोकै कारण मुस्ताङका ६४ सामुदायिक, निजी र गुम्बा विद्यालय बन्द छन् । चिसो बढेकाले खर्कमा पालन गरिएका याकचौरी, भेडा, च्याङ्गा बस्ती नजिक स्थान्तरण गरिएको पशुपालक किसान भूपिन शेरचनले बताए ।

सम्बन्धित खबर