बुधबार, ०८ बैशाख २०७८
samadhannews
क्यानडा लैजान्छु भनेर ९० लाख ठग्ने धीरज पक्राउ

क्यानडा लैजान्छु भनेर ९० लाख ठग्ने धीरज पक्राउ

बिहिबार, १५ माघ २०७७

अनिष भट्टराई, पोखरा

स्याङ्जाका दिवस गुरुङ गाउँमै बेरोजगार भएर बसेका थिए । विदेश जाने मन गरेर पासपोर्ट पनि बनाए ।

डेढ वर्षअघिखाडी मुलुक जाने सोचमा रहेका उनको भेट एक एजेन्टसँग भयो । जसले उनलाई खाडी हैन क्यानडाको सपना देखायो ।

धीरजलाई क्यानडाको ‘ललीपप’ले लोभ्यायो । क्यानडा लैजान एजेन्टले भेटाउने भनेको मानिसलाई भेट्न पुगे । उनले १ लाख रुपैयाँ तत्काल उक्त एजेन्टलाई दिए । विदेश जाने दिन कुरेर बसे ।

वालिङ १३ का ध्रुव पाठक शारदा मन्दिर माविमा पढाउँछन् । गाउँकै दीपेन्द्र विश्वकर्मा अर्को विद्यालयमा पढाउँछन् । दीपेन्द्रले आफूलाई क्यानडा जाने मौका आएको खबर ध्रुवलाई सुनाए ।

ध्रुवलाई पनि क्यानडा जाने रहर जाग्यो । दीपेन्द्र र ध्रुवकै गाउँका भोजबहादुर कार्की क्यानडा छन् । भोजबहादुरको विश्वासपात्र थिए, दीपेन्द्रलाई क्यानडा लान्छु भन्ने एजेन्ट । भोजबहादुरलाई देखाएर नै ती एजेन्टले ध्रुव र दीपेन्द्रलाई क्यानडा लान्छु भनेर विश्वास बटुले । क्यानडा भनेपछि ध्रुवले २ र दीपेन्द्रले १ लाख ती एजेन्टलाई बुझाए ।

क्यानडा जाने दिन कुरेर बसेका स्याङ्जाका दिवस, ध्रुव र दीपेन्द्रमात्र थिएनन् । स्याङ्जा, तनहुँ, पर्वत, कास्कीका अरु २९ पनि थिए । सबैलाई एकै एजेन्टले क्यानडा लान्छु भनेर पैसा उठाउँदै बसेका थिए ।

ती एजेन्ट थिएः पर्वत मोदी गाउँपालिका७ का धीरजकुमार विश्वकर्मा । धीरजले पैसा उठाएकासँग पासपोर्ट पनि मागे । पासपोर्ट भारत पठाइसकेँ अब प्रक्रिया सुरु भयो भन्ने आश्वासन पनि दिइरहे ।

लामो समयमा प्रक्रिया पूरा नभएपछि उनीहरुले धीरजलाई सम्पर्क गरे । धीरजको एउटै जवाफ हुन्थ्यो– ‘कोरोना हटेपछि प्रोसेस सुरु हुन्छ ।’धीरजले उनीहरुको विश्वास जित्न बैंक तथा सहकारीका चेकसमेत उनीहरुलाई दिए ।

बारम्बार फोन गरेपछि ध्रुवलाई एकदिन धीरजले ‘क्यानडा भिसा एप्लिकेसन सेन्टर, दिल्ली’ जान सुझाए । त्यहाँ गए छिटो भिसा आउने जवाफ पाएपछि ध्रुवलगायत ५ जनाको टोली दिल्ली पुग्यो । त्यहाँबाट ‘छिट्टै इमेल आउँछ’ भन्ने जवाफ पाएपछि उनीहरु निर्धक्क देश फर्के । न त इमेल आयो न त धीरजको फोन नै उठ्यो ।

यत्तिका समयधीरजले फोन नउठाउने र उठाए पनि राम्ररी नबोल्ने गरेपछि उनीहरुलाई शंका लाग्यो । क्यानडा लगिने भनिएकाहरुले माघ १२ गते निवेदन प्रहरीकहाँ दिए । प्रहरीले भोलिपल्टै पोखरा ३० सिसुवाबाट धीरजलाई पक्राउ ग¥यो । धीरजआफैं १४ वर्ष खाडीमा बसेर नेपाल फर्किएका थिए ।

धीरजमाथि अनुसन्धान गर्दा उनले ३३ जनालाई ठगेको खुलेको जिल्ला प्रहरी कार्यालय कास्कीका जीवनकुमार श्रेष्ठले बताए । ३३ जनाबाट अहिलेसम्म उनले ९० लाख ७१ हजार ५ सय ठगी गरेको खुलेको छ । यो संख्या अझै बढ्न सक्ने प्रहरीको शंका छ ।

‘अरु २ जना पनि यसमा संलग्न भएको देखिएको छ, उनीहरुलाई खोज्दै छौं, ठगी भएकाहरु बढ्न सक्छन्,’ श्रेष्ठले भने । प्रहरीले बाँकी २ जनाको परिचय पाइसकेको छ । उनीहरुको खोजीतीव्र पारिएको प्रहरीको दाबी छ ।

सम्बन्धित खबर