शनिबार, २२ फागुन २०७७
samadhannews
ड्रोन क्यामेरासहित विदेशी पक्राउ

ड्रोन क्यामेरासहित विदेशी पक्राउ

बिहिबार, २९ माघ २०७७

उड्ड्यन प्राधिकरणमा दर्ता बिना र संरक्षित क्षेत्रमा स्थानीय प्रशासनको अनुमति बेगर उडान  

एसके थकाली, जोमसोम

मुस्ताङको बारागुङ मुक्तिक्षेत्र गाउँपालिका —१ मुक्तिनाथमा ड्रोन क्यामेरा उडाउँदै गरेका एक विदेशी सहित ३ नेपाली नागरिकलाई प्रहरीले पक्राउ गरेर छोडेको छ ।

नेपाल नागरिक उड्ड्यन प्राधिकरणमा दर्ता बिना र संरक्षित क्षेत्रमा स्थानीय प्रशासनको अनुमति बेगर मानवरहित हवाई उपकरण ड्रोन क्यामेरा उडाएकोले इलाका प्रहरी कार्यालय मुक्तिनाथको प्रहरी टोलीले अमेरिकी नागरिक वर्ष २८ का जेम्स राई सहितका ३ जना नेपाली पक्राउ परेका हो ।

पक्राउ परेका राईको पोसपोर्ट नम्बर ५९८९२२०४५ छ । अमेरिकाबाट ३० दिनको भिसा लिई नेपाल आएका राईसहित नेपाली टोली मोटरसाइकल चढेर मुस्ताङ आएका थिए ।

जिल्ला प्रहरी कार्यालय मुस्ताङले राईले प्रयोगको ७५० ग्राम वजनको मानवरहित हवाई उपकरण ड्रोन जफत गरेको छ ।

पक्राउ परेका राईसहित ३ जनालाई सामान्य सोधपुछपछि छोडिएको जिल्ला प्रहरी कार्यालय मुस्ताङका प्रहरी निरीक्षक आशीष अधिकारीले जानकारी दिए ।

उनीहरुले मुक्तिनाथ दर्शन गर्ने क्रममा मनोरञ्जनका लागि ड्रोन उडाएको प्रहरी समक्ष बताएका छन् ।

प्रहरीले जफत गरिएको ड्रोन क्यामेरा बिहीबार नागरिक उड्ड्यन कार्यालय जोमसोमलाई बुझाएको छ ।

कृषि, शिक्षा, स्वास्थ्य, वन तथा वातावरण, कलासंस्कृति, मनोरञ्जन, विकास तथा विपद् व्यवस्थापन, सुरक्षा तथा आमसञ्चार लगायथ विषयमा अध्ययन अनुसन्धान, सूचना सम्प्रेषण र सर्वेक्षणका लागि ड्रोन उपयोग गर्ने व्यक्ति, संघ र संस्था लगायतका निकायले नागरिक उड्ड्यन प्राधिकरणको अनुमति लिनुपर्छ ।

एक वर्ष उपल्लो मुस्ताङमा निषेधित तथा नियन्त्रित क्षेत्रमा ड्रोन उडाएकाले स्थानीय प्रशासनले एक चिनियाँ नागरिकलाई पक्राउ गरी ड्रोन जफत गरेको थियो ।

उपल्लो मुस्ताङमा ड्रोन उडाएकोले नेपाली चलचित्र ‘सम्हालिन्छ कहिले मन’ युनिटको ड्रोन जफत गरिएको थियो ।

सम्बन्धित खबर