शनिबार, २२ फागुन २०७७
samadhannews
मुख्यमन्त्री कपः पहिलो खेलमा स्याङ्जासँग कास्की पराजित

मुख्यमन्त्री कपः पहिलो खेलमा स्याङ्जासँग कास्की पराजित

मङ्गलबार, ०४ फागुन २०७७

समाधान संवाददाता, पोखरा

प्रथम मुख्यमन्त्री कप गण्डकी प्रदेशस्तरिय भलिबल प्रतियोगिताको पहिलो खेलमा कास्कीको पुरुष टोली पराजित भएको छ ।

मंगलबार पोखरा रंगशालामा भएको खेलमा कास्की स्याङ्जासँग पराजित भएको हो ।

लिगकम नकआउट फम्र्याटमा खेलाइएको खेलमा कास्कीलाई स्याङ्जाले २५–१९ र २५–१८ को सोझो सेटमा पराजित ग¥यो । प्रतियोगितामा सेमिफाइनलसम्मका खेल बेस्ट अफ ३ फम्र्याटमा खेलाइएको थियो ।

स्याङ्जासँगको खेलमा दुवै सेटमा सुरुवाती अग्रता लिएको कास्कीले अग्रता जोगाउन नसक्दा खेल गुमायो । स्याङ्जाको टोली केही अनुभवी देखिएको थियो ।

स्याङ्जाको टोलीमा गण्डकी प्रदेश भलिबल टोलीका कप्तान हरि पाण्डे, सशस्त्र प्रहरी बलका स्पाइकर बिजय थापा, गण्डकी प्रदेश पुरुष भलिबल टोलीका ईश्वर थापालगायत राष्ट्रिय प्रतियोगिता खेलिरहने खेलाडी थिए ।

पुरुषतर्फकै अर्को खेलमा तनहुँले मुस्ताङलाई हरायो । मुस्ताङमाथि तनहुँले २५–१६ र २५–९ को जित दर्ता गरेको हो । बिशाल ठकुरीको कप्तानीमा उत्रिएको तनहुँले सुरुवातबाट नै मुस्ताङलाई दबाबमा राख्दै सहज जित हात पारेको हो ।

तनहुँकै महिला टोलीले लमजुङलाई हराउँदै प्रतियोगितामा विजयी सुरुवात गरेको छ । तनहुँले लमजुङलाई २५–१४ र २५–७ को सेटमा पराजित गरेको हो ।

तनहुँकी कप्तान उषा भण्डारीबाहेक खेलमा राष्ट्रिय टोलीका खेलाडी समावेश थिएनन् । टाइगर कप राष्ट्रिय भलिबल प्रतियोगितामा सर्वोत्कृष्ट खेलाडी छनौट भएकी भण्डारीले मंगलबार पनि सम्झनलायक प्रदर्शन गरिन् ।

महिलातर्फकै प्रतिस्पर्धामा पर्वतले स्याङ्जालाई हराएको छ । पर्वतले २५–१६ र २५–२१ को सेटमा जित हात पा¥यो । प्रतियोगिता अन्तर्गत भएको पहिलो खेलमा म्याग्दीले नवलपुरमाथि शानदार जित दर्ता ग¥यो ।

नवलपुरलाई म्याग्दीले २५–५ र २५–१५ को सेटमा हरायो । पहिलो सेटमा म्याग्दीका लागि राष्ट्रिय टोलीकी कप्तान अरुणा शाही, राष्ट्रिय टोलीकै सदस्य कमला पुनले खेलेका थिए । दोस्रो सेटमा भने शाही र पुन कोर्ट बाहिर बसेका थिए ।

बुधबार प्रतियोगितामा ९ खेल हुँदैछन् । मंगलबार पानी परेर रद्द भएका दुई खेलसँगै बुधबारका लागि पूर्वनिर्धारित ७ खेल हुनेछन् । पहिलो खेलमा पुरुषतर्फ बागलुङ र म्याग्दी खेल्दा दोस्रो खेलमा नवलपुर र गोरखा खेल्नेछन् ।

तेस्रो खेलमा पर्वत र तनहुँ, चौंथो खेलमा म्याग्दी र लमजुङ, पाँचौं खेलमा पर्वत र मुस्ताङ खेल्दा छैटौं खेलमा बागलुङ र लमजुङ भिड्नेछन् ।

बुधबार महिलातर्फ ३ खेल हुँदैछन् । महिलातर्फको पहिलो खेलमा लमजुङ र बागलुङ खेल्दा दोस्रो खेलमा कास्कीले मुस्ताङको सामना गर्नेछ । अन्तिम खेलमा तनहुँ र बागलुङबीच खेल हुने तालिका छ ।

९ गतेसम्म चल्ने प्रतियोगिताको विजेता महिला र पुरुष टोलीले समान २–२ लाख नगद पुरस्कार पाउनेछन् ।

दोस्रो हुने टोलीले नगद १÷१ लाख रुपैयाँ प्राप्त गर्नेछन् । यस्तै तेस्रो हुने टोलीले ५० हजार रुपैयाँमा चित्त बुझाउनेछन् ।

विधागत उत्कृष्ट हुने खेलाडीहरुले जनही ५÷५ हजार रुपैयाँ प्राप्त गर्ने आयोजकले जनाएको छ ।

सम्बन्धित खबर