शनिबार, २२ फागुन २०७७
samadhannews
गण्डकी विश्वविद्यालयमा यसै वर्षदेखि पढाइ, १० करोडको भवन बन्दै

गण्डकी विश्वविद्यालयमा यसै वर्षदेखि पढाइ, १० करोडको भवन बन्दै

बुधबार, ०५ फागुन २०७७

समाधान संवाददाता, पोखरा

गण्डकी प्रदेश विश्वविद्यालयले नेतृत्व पाएको मंगलबार वर्ष दिन पुगेको छ । प्रदेश सरकारको वार्षिकोत्सवकै दिन अघिल्लो वर्ष प्राडा गणेशमान गुरुङले विश्वविद्यालयको कुलपतिको सपथ लिएका थिए । सोही दिन क्षेत्रीय शिक्षा निर्देशनालयमा विश्वविद्यालयको कार्यालय खोलिएको थियो ।

प्रदेशमा आफ्नै दक्ष र प्राविधिक जनशक्ति उत्पादन गर्ने लक्ष्यसहित स्थापना भएको गण्डकी विश्वविद्यालयले १ वर्ष पूरा गरेको अवसरमा मंगलबार समीक्षा गरेको छ । विश्वविद्यालयले यसै वर्ष ३ संकायमा पढाइ सुरु गर्ने गरी पाठ्यक्रम र कक्षा सञ्चालन गर्ने अस्थायी संचना पनि तयार भइसकेको कुलपति गुरुङले जानकारी दिए ।

गएको असार २९ गते बेलचौतारामा १ सय ७५ रोपनी र पोखरा–३२ मा ३ सय ५१ रोपनी जग्गा प्राप्त भएको थियो । वडा नम्बर ३२ मा अहिले १० करोड रुपैयाँको लगानीमा भवन निर्माण भइरहेको प्राडा गुरुङले जानकारी दिए ।

‘हाम्रो आफ्नै भवन बन्दै गर्छ, त्यो भन्दाअघि यसै वर्षदेखि वडा नम्बर ३२ को कार्यालय रहेको भवनमा स्नातक तहको मेडिकल साइन्स सुरु गर्ने तयारी भइरहेको छ । त्यहाँ बी फार्मेसी पनि यसै वर्षदेखि पढाइ सुरु हुने छ,’ प्राडा गुरुङले भने, ‘महेन्द्रपुलमा रहेको पुरानो हुलाकको नयाँ भवनमा सूचना प्रविधिको पढाइ सुरु गर्न कोठा प्राप्त भएको छ ।’

त्यसका लागि पाठ्यक्रम तयार भइसकेको छ । विश्वविद्यालयमा एमबिबिएसको पाठ्यक्रम बनाउन डा. धु्रव अधिकारीको संयोजकत्वमा कार्यदल बनाएको छ । विश्वविद्यालयले यसै वषभित्र्र रणनीतिक योजना पनि बनाउने भएको छ । त्यसका लागि प्राध्यापक सूर्यबहादुर जिसीको संयोजकत्वमा कार्यदल गठन भएको छ ।

यो प्रदेशमा कुन विषयमा पढाइ आवश्यक छ भनेर अध्ययन गर्न प्राडा विश्वकल्याण पराजुलीको नेतृत्वमा अध्ययन कार्यदल गठन गरिएको कुलपति गुरुङले जानकारी दिए ।

विश्वविद्यालयको स्थापना, व्यवस्थापन सञ्चालन गर्न बनेको ऐन संसदबाट गत वर्ष असोज ८ गते पारित भएको थियो । विश्वविद्यालयमा अहिले कुलपति, उपकुलपति, रजिस्टार गरी ३ पदाधिकारी र ४ जना कर्मचारी छन् । गण्डकी विश्वविद्यालयको सर्वोच्च निकाय न्यासिक परिषद गठन भएको ६ महिना भइसकेको थियो ।

पहिलो वार्षिकोत्सवको कार्यक्रममा गण्डकी विश्वविद्यालयलाई अन्य विश्वविद्यालयभन्दा पृथक र गुणस्तरीय बनाउनुपर्ने मुख्यमन्त्री पृथ्वीसुब्बा गुरुङले बताए । दक्ष, प्रविधियुक्त र राजनीति मुक्त विश्वविद्यालयको परिकल्पना आफूले गरेको मुख्यमन्त्री गुरुङको भनाइ थियो ।

‘शिक्षा क्षेत्रमा राजनीति हाबी छ । जबसम्म राजनीतिले गाँज्छ तबसम्म विकास हुँदैन । विद्यालयमा पाठ्यपुस्तक छैन । गुणस्तरीय पढाई छैन । राजनीति छ । तालाबन्दी मात्र लगाइन्छ,’ मुख्यमन्त्री गुरुङले भने, ‘यस्तो विश्वविद्यालय हामीलाई चाहिएको होइन ।’

सम्बन्धित खबर