शनिबार, २२ फागुन २०७७
samadhannews
संसदीय अनुगमन समितिको कार्यविधि तयार

संसदीय अनुगमन समितिको कार्यविधि तयार

शुक्रबार, ०७ फागुन २०७७

समाधान संवाददाता, पोखरा

गण्डकी प्रदेश सभाको विशेष अधिवेशनबाट गठित संसदीय अनुगमन समितिले बिहीबार आफ्नो कार्यविधि पारित गरेको छ ।

संसद सचिवालयलाई समितिले कार्यविधि बनाउने जिम्मा दिएअनुसार सचिवालयले कार्यविधि तयार गरिदिएको थियो ।

समितिको तेस्रो बैठकले कार्यविधि पारित गरेको नेकपा संसदीय दलका प्रमुख सचेतक तथा अनुगमन समिति सदस्य मायानाथ अधिकारीले जानकारी दिए ।

यसअघि डाकिएको पहिलो बैठक दलीय प्रतिनिधित्व नपुग्दा स्थगित भएको थियो । दोस्रो बैठकमा भने समितिकी ज्येष्ठ सदस्य मित्रकुमारी गुरुङ सुवेदीलाई संयोजक बनाउनुका साथै कार्यविधिको प्रारुप तयार पारिएको थियो ।

कार्यविधि अनुसार पहिलो चरणको काम फागुन २५ गतेबाट सुरु हुनेछ । १ साता संसदीय अनुगमन समिति साविध धौलागिरि क्षेत्रका अस्पतालको अनुगमनमा निस्कनेछ ।

समिति सदस्य मायानाथ अधिकारीका अनुसार अनुगमन भ्रमणका क्रममा प्रत्येक जिल्लामा प्रमुख जिल्ला अधिकारीहरुको समन्वयमा सर्वदलीय–सर्वपक्षीय बैठक बस्नेछ । बैठकमा कोभिड व्यवस्थापनमा जिल्लामा भए÷गरेका कामकारबाहीको समीक्षा गरिनेछ ।

‘हामी पहिलो चरणमा चैत १ सम्म अनुगमनमा जानेछौं, त्यहाँ अस्पतालमा अनुगमन गर्नुका साथै अन्तक्र्रिया पनि गर्ने कार्यक्रम गराएका छौं,’ अधिकारीले भने ।

कार्यविधिमा अनुगमन समितिले प्रदेशका अस्पतालहरुमा रहेका उपकरण तथा कोभिड–१९ रोकथामका लागि आवश्यक सामग्रीको अवस्थाबारे अनुगमन गर्नेछ ।

अस्पतालहरुमा सरकारले घोषणा गरेजति आइसियु, भेन्टिलेटर बेड संख्या छ÷छैन समितिले निरीक्षण गर्नेछ । प्रदेशका अस्पतालहरुमा बेड संख्या, कोभिडका लागि छुट्याइएको बेड संख्या र असपतालहरुले गरेका काम कारबाहीबारे समितिले जानकारी लिनेछ ।

अस्पतालमा जनशक्तिको अवस्थाबारे बुझ्ने र अपुग भएका अस्पतालमा जनशक्ति थप्न सिफारिस पनि समितिले गर्नेछ । कोरोनाविरुद्धको खोप लगाएका बिरामीको प्रतिक्रिया, खोपको उपलब्धता र प्रभावबारे पनि समितिले जानकारी माग्ने कार्यविधिमा उल्लेख छ । कोरोना व्यवस्थापनमा संघ, प्रदेश र स्थानीय तहबाट प्राप्त बजेट खर्चको अवस्थाबारे समितिले अनुगमन गर्ने जनाइएको छ ।

दोस्रो र तेस्रो चरणको अनुगमन कार्यक्रम चैत पहिलो साता निक्र्यौल गरिने समिति सदस्य आशा कोइरालाले बताइन् । ‘हामी पहिलो चरणको कार्यक्रम सकेपछि बाँकी चरणका बारेमा निक्र्यौल गर्नेछौं, वैशाख ६ गतेसम्म समितिको कार्यअवधि तोकिएको छ,’ उनले भनिन् ।

गण्डकी प्रदेश सभाको विशेष अधिवेशनले संयुक्त संसदीय अनुगमन समिति बनाएको थियो । संसदमा लगिएको संकल्प प्रस्ताव पारित गर्दै अनुगमन समिति बनाइएको थियो । विशेष अधिवेशन २१ पुसदेखि ६ माघसम्म चलेको थियो ।

९ सदस्यीय समितिको ३ महिने कार्यअवधि तोकेर समिति गठन भएको थियो । कार्यविधि भने समितिले नै बनाउनुपर्ने सदनको निर्णय थियो । प्रदेश सभा नियमावलीको नियम १५२ अनुसार संसदीय अनुगमन समिति गठन गर्न सक्ने उल्लेख छ ।

सर्वदलीय सहमतिमा विशेष अधिवेशनको पाँचौं बैठकमा कांग्रेस संसदीय दलका नेता कृष्णचन्द्र नेपाली पोखरलेले प्रस्ताव पेस गरेका थिए । सोही प्रस्ताव अनुसार संसदीय समितिको मुख्य काम कोरोना नियन्त्रणका लागि सरकारले गरेका काम र खर्च गरेको बजेटबारे अनुगमन गर्ने थियो ।

समितिमा नेकपा दाहाल नेपाल समूहबाट आशा कोइराला, चन्द्रबहादुर बुढा, राजमोका खिमविक्रम शाही, जसपाकी धनमाया लामा पोखरेल, कांग्रेसका मणिभद्र शर्मा र सरिता गुरुङ तथा नेकपा ओली समूहका मायानाथ अधिकारी, मित्रकुमारी गुरुङ सुवेदी र रोशन गाहामगर छन् ।

सम्बन्धित खबर