मङ्गलबार, १२ साउन २०७८
samadhannews
Sanima Bank New year offer

कोही डराउनुपर्दैन, निष्पक्ष भएर काम गर्छुः प्रदेश प्रमुख

शुक्रबार, २४ बैशाख २०७८

पोखरा, २३ वैशाख

गण्डकी प्रदेशकी नवनियुक्त प्रदेश प्रमुख सीताकुमारी पौडेलले आफू निष्पक्ष ढंगले काम गर्ने बताएकी छन् । उनले कोही सशंकित हुनु पर्दैन भन्दै सबैसँग सहकार्य गरेर र संविधान अनुसार कार्य सम्पादन गर्ने बताइन ।

प्रधानमन्त्री केपी ओलीले माओवादी निकट प्रदेश प्रमुख अमिक शेरचनलाई पदमुक्त गरेर पौडेललाई जिम्मेवारी दिएपछि प्रदेश सभाका विपक्षीमा संशय छाएको छ । तर आफू संविधान सभा सदस्य रहेको र संविधानले तोकेको कार्यक्षेत्र हेरेर काम गर्ने बताउँदै डराउनु नपर्ने उनी बताउँछिन् । समाधानसँगको कुराकानीमा उनले केही दिनमा सबै पक्षसँग छलफल थाल्ने बताइन् । प्रस्तुत छ समाधानले बिहीबार पौडेलसँग गरेको कुराकानीको सम्पादित अंशः

तपाईंको पद सरकार रहेसम्म रहने देखिन्छ । छोटो समयका लागि सरकारले दिएको जिम्मेवारी स्वीकारेर यहाँ आउनुको उद्देश्य के हो ?

पहिलो कुरा त सरकारले निर्णय गरेपछि त्यसलाई नकार्ने कुरा भएन । सरकारको निर्णयलाई राष्ट्रपतिको नियुक्तिलाईसम्मान गरेर यहाँ आएकी हुँ । दोस्रो कुरा म पनि संविधान सभा सदस्य हुँ ।

संविधान बनाउने कुरामा म पनि लागेको हुनाले संवैधानिक पदका अधिकार, कार्यक्षेत्र, कर्तव्य के हुन्छन् भन्ने बुझेर नै म यहाँ आएकी हुँ ।

त्यसैले यो स्थायी होस् या अस्थायी होस्, हामीलाई केही फरक पार्दैन । हुन सक्छ अब यो पद भोलि नै पो छोड्नुपर्ने हुन्छ कि । लामो समय यसको कार्यकाल भरी बस्न पनि सकिन्छ । परिस्थितिजन्य कुरा भए यी सबै । यी कुराहरु बुझेर नै म यहाँ आएकी हुँ ।

प्रदेशको सरकार र संसदको सिनारियो बुझ्नु भएको होला । संसद अहिले स्थगित छ, सभामुख र सरकारपक्ष आरोपप्रत्यारोपमा हुँदा तपाईं नियुक्त भएर आउनु भएको छ । यसलाई कसरी हेर्नुहुन्छ ?

मेरो पदको भूमिका भनेको सहजीकरण गर्ने, समन्वय गर्ने, सहज वातावरण बनाउने र सरकार सदनलाई निकास दिने हुन्छ । अब यसका लागि सबैपक्षबाट सहजीकरण गर्नुपर्ने भएपनि गर्नुपर्ने हुन्छ । मसम्म आइपुग्दा अब यसलाई कसरी टुंगोमा पु¥याउने भन्ने भूमिका मसँग हुन्छ ।

अविश्वास प्रस्ताव ल्याएका प्रतिपक्षी तपाईंको भूमिकामा त्रसित छन्, अलि असहयोग गर्ने खालको भूमिका हुन्छ कि भन्ने आशंका छ । यसलाई चिर्न कसरी पहल गर्नुहुन्छ ?

अब यो नियुक्ति सरकारले गरेको भएपनि यो पद एकदमै निष्पक्ष ढंगले काम गर्नुपर्ने पद हो । कसैलाई अप्ठेरो पर्ने काम गर्दिनँ । प्रतिपक्षी डराउनु पर्दैन ।

प्रतिपक्षीको भूमिकामा उहाँहरु हुनुहुन्छ, सरकारको भूमिकामा सरकार छ । सत्ताका सांसदहरु आफ्नै भूमिकामा हुन्छन् । मेरो काम चाहिँ सबैलाई समेटेर एउटै मूलधारमा बढाउने प्रयास हुन्छ ।

म आएको भर्खर ३ दिन भएको छ । अहिलेसम्म छलफल गरेकी छैन । यहाँको सिस्टम म अध्ययन गरिरहेकी छु । केही समय लाग्छ । अनि सबैसँग छलफल गर्छु ।

संघीयता बलियो बनाउन यहाँको भूमिका के हुन्छ ?

संघीयतालाई बलियो बनाउन पहिला प्रदेश सरकार बलियो हुनुपर्छ । प्रदेश सरकार बलियो भयो भने प्रदेश सरकारले जनताका धेरै काम गर्न सक्छ ।

प्रदेश सरकारलाई काम गर्न सहज हुने वातावरण कायम गर्ने काममा मेरो भूमिका हुन्छ । किनभने फेरि अहिले नेपालको सन्दर्भमा हेर्दा हामी बल्ल संघीयताको अभ्यास गर्दैछौं । संघीयताको धेरै अनुभव छैन । त्यति हुँदा हुँदै पनि हाम्रो देशको सन्दर्भमा संघीयताको मूल कडी भनेको प्रदेश सरकार नै रहेछ ।

किनभने पहिला संघ सरकार थियो, स्थानीय निकाय थियो । तर प्रदेश थिएन, विकास क्षेत्रहरु थिए । त्यो पनि संविधान अनुसार थिएनन् । तर अहिले थपिएको संरचना भनेको प्रदेश हो ।

प्रदेश बलियो भयो भने संघीयता बलियो हुन्छ र प्रदेश कमजोर भयो भने संघीयता नै कमजोर बन्छ । त्यही भएर यहाँको सबै पुलिस, प्रशासन, सुरक्षा क्षेत्र र राज्यका सबै संरचनालाई बलियो बनाउन सके संघीयता बलियो हुन्छ ।

जीवननै राजनीतिमा बिताएर तपाईं सेरेमोनियल पोस्टमा आउनुभएको छ । यसमा तपाईं फिट छु भन्ने लाग्छ ? कार्यकाल कसरी बिताउँछु भन्ने सोच्नुभएको छ ?

म यो पदमा बसेर निस्क्रिय हुन्छु जस्तो लाग्दैन । हुन त म ३ दिन भयो यहाँ आएको । अब के हुन्छ भने यहाँका ऐन, कानुन पास गर्ने प्रमाणित गर्ने काम प्रदेश प्रमुखले नै गर्छ ।

नीति तथा कार्यक्रम प्रस्तुत गर्ने काम पनि प्रदेश प्रमुखकै जिम्मेवारी भित्रै पर्छ । यसो भएपनि सबै ऐन, कानुन अध्ययन गर्नुप¥यो । भौतिक रुपमा सक्रिय हुनु नपर्ने तर मानसिक रुपमा सक्रिय भइराख्नुपर्ने पद जस्तो लाग्यो । अहिले ३ दिनकै अनुभवमा पनि सबैको कुरा सुन्नुपर्ने, बुझ्नुपर्ने भएकाले मानसिक रुपमा सक्रिय नै भइराख्नुपर्ने रहेछ ।

यो पदले सक्रिय राजनीति समाप्त गर्छ जस्तो लाग्दैन ?

सक्रिय राजनीति भनेर कुनै पार्टीमा समाहित हुने भन्ने त हुँदैन । तर मलाई के लाग्छ भने मान्छे भनेकै राजनीतिक प्राणी हो । राजनीति भनेको संगठित हुने, पार्टीको कुनै पद लिनेमात्रै होइन । भौतिक रुपमा गर्ने खालका राजनीतिक क्रियाकलापबाट त बञ्चित भइन्छ होला तर राजनीतिक भविष्य नै समाप्त पार्छ भन्ने लाग्दैन ।

सम्बन्धित खबर